കണ്ണൂര്: കണ്ണൂര് ജില്ലാ ആശുപത്രിയില് രണ്ട് ഡയാലിസിസ് യന്ത്രങ്ങളുടെയും അനുബന്ധ ഉപകരണങ്ങളുടെയും സമര്പ്പണംമന്ത്രി രാമചന്ദ്രന് കടന്നപ്പള്ളി നിര്വഹിച്ചു. ജില്ലാ ആശുപത്രിയില് ലാപ്രോസ്കോപിക് ശസ്ത്രക്രിയ യൂനിറ്റ് അനുവദിക്കണമെന്ന ജില്ലാ പഞ്ചായത്തിന്റെ ആവശ്യം പരിഗണിച്ച് വേണ്ട സഹായം ചെയ്യാമെന്ന് മന്ത്രി പ്രതികരിച്ചു. എം.എല്.എമാരുടെ ആസ്തി വികസന ഫണ്ടില്നിന്ന് അനുവദിച്ച 13.23 ലക്ഷം രൂപ വിനിയോഗിച്ച് മന്ത്രി അനുവദിച്ച രണ്ട് യന്ത്രങ്ങളാണ് ഉദ്ഘാടനം ചെയ്തത്.
ഇതോടെ ജില്ലാ ആശുപത്രിയില് ആകെ 19 ഡയാലിസിസ് യന്ത്രങ്ങളായി. ഇവ ഉപയോഗിച്ച് പ്രതിദിനം എഴുപതോളം ഡയാലിസിസ് നല്കാനാവും. ജില്ലാ ആശുപത്രിയില് ഡയാലിസിസിനായി 874 പേര് രജിസ്റ്റര് ചെയ്തിട്ടുണ്ട്. ഇതില് 533ാമത്തെ ആള്ക്കാണ് ഒടുവിലായി ടോക്കണ് നല്കിയത്. 341 പേര് ഡയാലിസിസിനായി കാത്തിരിക്കുകയാണ്. ഡയാലിസിസ് യന്ത്രങ്ങളെ കൂടാതെ രണ്ട് മള്ട്ടിപാര മോണിറ്ററുകള്, ഒരു ബൈ കാര്ബണേറ്റ് മിക്സ്ചര്, രണ്ട് ബെഡ്ടോപ്പ് ടേബിള് എന്നിവയും നല്കിയിട്ടുണ്ട്. സംസ്ഥാന സര്ക്കാറിന്റെ ‘ആര്ദ്രം’ പദ്ധതിയിലൂടെ സര്ക്കാര് ആശുപത്രികള് ജനങ്ങളുടെ പ്രതീക്ഷക്കൊത്ത് ഉയര്ത്തുന്നതിന്റെ ഭാഗം കൂടിയാണ് ഈ വിപുലീകരണം.
ജില്ലാ ആശുപത്രിയില് ഡയാലിസിസ് ചെയ്യുന്നവര്ക്ക് കുറഞ്ഞത് 2,000 രൂപയെങ്കിലും പ്രതിമാസം നല്കാന് കഴിയുന്ന പദ്ധതി ജില്ലാ പഞ്ചായത്തിന്റെ ‘സ്നേഹജ്യോതി’ കിഡ്നി പേഷ്യന്സ് വെല്ഫെയര് സൊസൈറ്റി ആവിഷ്കരിക്കുമെന്ന് ചടങ്ങില് അധ്യക്ഷത വഹിച്ച ജില്ലാ പഞ്ചായത്ത് പ്രസിഡണ്ട് കെ.വി.സുമേഷ് പറഞ്ഞു. വൈസ് പ്രസിഡന്റ് പി.പി.ദിവ്യ, കന്േറാണ്മെന്റ് ബോര്ഡ് വൈസ് പ്രസിഡന്റ് റിട്ട. കേണല് പി.പത്മനാഭന്, ജില്ലാ പഞ്ചായത്ത് സ്ഥിരം സമിതി അധ്യക്ഷരായ കെ.പി.ജയബാലന്, കെ.ശോഭ, ജില്ലാ പഞ്ചായത്തംഗം അജിത്ത് മാട്ടൂല്, ഡെപ്യൂട്ടി ഡി.എം.ഒ എ.ടി മനോജ്, ജില്ലാ ആശുപത്രി സൂപ്രണ്ട് ഇന് ചാര്ജ് ഡോ.വി.പി.രാജേഷ് എന്നിവര് സംസാരിച്ചു.
