ആലപ്പുഴ: ജില്ലയില്നിന്ന് മത്സ്യബന്ധനത്തിന് പോയി കാണാതായവരെ കണ്ടെത്താനും കടല്ക്ഷോഭം മൂലം ദുരിതമനുഭവിക്കുന്നവര്ക്ക് ദുരിതാശ്വാസം എത്തിക്കാനും ജില്ലാ കളക്ടറും ജില്ലാ ഭരണകൂടവും ഉറക്കമളച്ച് പ്രവര്ത്തിച്ചു. ജോയല് വള്ളത്തില് കടലില് പോയവരെ കണ്ടെത്താന് കോസ്റ്റ് ഗാര്ഡിന്റെയും നേവിയുടെയും സഹായത്തിനു പുറമേ മറൈന് എന്ഫോഴ്സ്മെന്റിന്റെ സഹായവും ഉറപ്പുവരുത്തിയിരുന്നു. ഏരിയല് സെര്ച്ച് അടക്കമുള്ള പരിശോധനകള്ക്ക് ജില്ലാ ഭരണകൂടം ആവശ്യപ്പെട്ടിരുന്നു.
മറ്റിടങ്ങളില്നിന്ന് മത്സ്യബന്ധനത്തിനുപോയി കാണാതായ ആലപ്പുഴ ജില്ലക്കാരെ കണ്ടെത്തുന്നതിന് കണ്ട്രോള്റൂം നിതാന്തപരിശ്രമമാണ് നടത്തിയത്. ലഭിക്കുന്ന വിവരങ്ങള് പരിശോധിക്കാനും ദുരിതാശ്വാസമെത്തിക്കാനും 24 മണിക്കൂറും കളക്ടറേറ്റിലെ കണ്ട്രോള് റൂം ഉണര്ന്നിരുന്നു. കടല്ക്ഷോഭത്തെത്തുടര്ന്ന് രാത്രിയില് ദുരിതാശ്വാസക്യാമ്പുകള് തുറക്കുന്നതിന് ജില്ലാ കളക്ടര് ഞായറാഴ്ച പുലര്ച്ചെ വരെ കണ്ട്രോള് റൂമിലുണ്ടായിരുന്നു. രാവിലെ ഒമ്പതോടെ വീണ്ടുമെത്തിയാണ് 19 മത്സ്യത്തൊഴിലാളികളെ കരയില് എത്തിക്കുന്നതിനുള്ള സംവിധാനങ്ങളൊരുക്കിയത്.
ജില്ലാ പോലീസ് മേധാവിയുടെ നേതൃത്വത്തില് പോലീസും ജാഗ്രതയോടെ പ്രവര്ത്തിച്ചു. ദുരിതാശ്വാസമെത്തിക്കാനും ജനങ്ങളെ സുരക്ഷിത സ്ഥലങ്ങളിലേക്ക് മാറ്റാനും തഹസില്ദാര്മാരും വില്ലേജ് ഓഫീസര്മാരും ഫിഷറീസ് ഡെപ്യൂട്ടി ഡയറക്ടറും ഡെപ്യൂട്ടി കളക്ടര്മാരും സജീവമായി നിലകൊണ്ടു. ഓരോ മണിക്കൂര് ഇടവിട്ട് സ്ഥിതിഗതികള് സര്ക്കാര് വിലയിരുത്തുന്നുണ്ട്.ലഭിക്കുന്ന വിവരങ്ങള് ജില്ലാ ഇന്ഫര്മേഷന് ഓഫീസില്നിന്ന് അപ്പപ്പോള് മാധ്യമങ്ങള് വഴി ജനങ്ങളിലെത്തിച്ചു. കളക്ടറേറ്റിലെ കണ്ട്രോള് റൂമിനൊപ്പം ഫിഷറീസിന്റെ കണ്ട്രോള് റൂമും പ്രവര്ത്തിക്കുന്നു.
