ആലപ്പുഴ: 58-ാമത് റവന്യൂ ജില്ലാ കലോത്സവം നാലു മുതല് എട്ടുവരെ കണിച്ചുകുളങ്ങര വിഎച്ച്എസ്എസില് നടക്കും. ഇന്നു രാവിലെ 10മുതല് രജിസ്ട്രേഷന്. നാളെ രാവിലെ 10ന് മന്ത്രി തോമസ് ഐസക് ഉദ്ഘാടനം ചെയ്യും.
മന്ത്രി പി. തിലോത്തമന് അദ്ധ്യക്ഷനാകും. എസ്എന്ഡിപിയോഗം ജനറല് സെക്രട്ടറി വെള്ളാപ്പള്ളി നടേശന് മുഖ്യാതിഥിയാകും. പത്തുവേദികളിലായാണ് മത്സരങ്ങള് ക്രമീകരിച്ചിട്ടുള്ളത്. സംസ്കൃതോത്സവം പെരുന്നേര്മംഗലം ഗവ. എല്പി സ്കൂളിലും അറബിക് കലോത്സവം വിഎച്ച്എസ്എസ് തെക്കേഹാളിലും നടക്കും.
മത്സര ദിവസങ്ങളില് സൂപ്പര് ഫാസ്റ്റ് ഉള്പ്പെടെയുള്ള ദീര്ഘദൂര സര്വ്വീസുകള്ക്ക് കണിച്ചുകുളങ്ങരയില് സ്റ്റോപ്പ് അനുവദിക്കും. മുഹമ്മ പാപ്പാളി പി.കെ. ഷണ്മുഖത്തിന്റെ നേതൃത്വത്തില് അഞ്ചുദിവസവും നാലുനേരം മൂവായിരത്തോളം പേര്ക്ക് ഭക്ഷണവും വിതരണം ചെയ്യും. എട്ടിന് വൈകിട്ട് 4ന് സമാപനസമ്മേളനം മന്ത്രി ജി. സുധാകരന് ഉദ്ഘാടനം ചെയ്യും. കൊടിക്കുന്നില് സുരേഷ് എംപി സമ്മാനദാനം നിര്വ്വഹിക്കും.
