ആലപ്പുഴ: ജില്ലയില് നിന്നും മത്സ്യ ബന്ധനത്തിനുപോയി തിരിച്ചെത്തിയിട്ടില്ലാത്ത അഞ്ചു പേര്ക്കായി അന്വേഷണം ഊര്ജ്ജിതമാക്കിയെന്ന് അധികൃതര്, ആശങ്കയൊഴിയാതെ ബന്ധുക്കളും നാട്ടുകാരും.
മാരാരിക്കുളം തെക്ക് പഞ്ചായത്തിലെ ചെട്ടികാടു നിന്നും നാല് ദിവസം മുമ്പ് അഞ്ചു തൊഴിലാളികളുമായി മത്സ്യബന്ധനത്തിന് പോയ ജോയല് വള്ളത്തിലെ തൊഴിലാളികളെക്കുറിച്ച് വിവരം ലഭിക്കാത്തതിനെ തുടര്ന്ന് ക്ഷുഭിതരായ നാട്ടുകാര് ദേശീയപാത പൂങ്കാവ് ജങ്ഷന് ഉപരോധിച്ചു. പോലീസെത്തി ഇവരെ നീക്കം ചെയ്തു.
മാരാരിക്കുളം തെക്ക് പഞ്ചായത്ത് 12-ാം വാര്ഡ് ആറാട്ടുകുളങ്ങര ജോസഫ്, അരയശ്ശേരി യേശുദാസ്, 16-ാം വാര്ഡ് പുന്നയ്ക്കല് ജോയി, ചേര്ത്തല സൗത്ത് ചേന്നവേലി വളപ്പില് സിബിച്ചന്, ആലപ്പുഴ നഗരസഭ മംഗലം വാര്ഡ് ഷാജി എന്നിവരാണ് വള്ളത്തിലുണ്ടായിരുന്ന തൊഴിലാളികള്.
സാധാരണ നാല് ദിവസം കൂടുമ്പോഴാണ് ഇവര് മടങ്ങി വരാറുള്ളത്. ശനിയാഴ്ച രാവിലെയാണ് ഇവര് എത്തേണ്ടിയിരുന്നത്. തൊഴിലാളികളെ ഫോണില് ബന്ധപ്പെടാന് ശ്രമിച്ചെങ്കിലും നടന്നില്ല. ഇവരെ കണ്ടെത്താനുള്ള തെരച്ചില് നടപടികള് ഊര്ജ്ജിതമാക്കിയിട്ടുണ്ട്.
ഇവരെ കണ്ടെത്തുന്നതിന് ഉള്ക്കടലില് കപ്പലും തീരത്തു നിന്നകന്ന് കോസ്റ്റ് ഗാര്ഡിന്റെ ബോട്ടും തെരച്ചില് നടത്തുന്നുണ്ട്. കഴിഞ്ഞ വ്യാഴാഴ്ചയാണ് ഇവര് കടലില് പോയത്. ഇവരെ കണ്ടത്തി രക്ഷപ്പെടുത്തുന്നതിന് ഹെലികോപ്റ്ററിലും ശ്രമം നടത്തുന്നുണ്ട്.
ട്യൂണ മത്സ്യം പിടിക്കുന്നതിന് ലക്ഷദ്വീപ് ഭാഗത്തേയ്ക്ക് ചിലപ്പോള് ഇവര് പോകാറുള്ളതിനാല് തെരച്ചില് ആ ഭാഗത്തേയ്ക്കും വ്യാപിപ്പിച്ചിട്ടുണ്ട്. ഇവരെ സംബന്ധിച്ച വിവരങ്ങള്ക്കായി ലക്ഷദ്വീപ് ഭരണകൂടവുമായി ബന്ധപ്പെട്ടിട്ടുണ്ട്. രക്ഷാപ്രവര്ത്തനത്തില്പ്പെട്ട് ഇവര് കേരളത്തിലെ മറ്റേതെങ്കിലും ജില്ലയിലോ സംസ്ഥാനത്തോ എത്തിയിട്ടുണ്ടോയെന്നും അന്വേഷിക്കുന്നുണ്ട്.
ജില്ലാ കളക്ടര് ആവശ്യപ്പെട്ടതനുസരിച്ച് തെരച്ചിലിനായി മറൈന് എന്ഫോഴ്സ്മെന്റ് ബോട്ടു വിട്ടു കിട്ടുന്നതിനുള്ള നടപടികള് സംബന്ധിച്ച് ചീഫ് സെക്രട്ടറിയുമായി മന്ത്രി തോമസ് ഐസക്ക് ഫോണില് ബന്ധപ്പെട്ടു.
കടല് ക്ഷോഭത്തെ തുടര്ന്ന് മത്സ്യ ബന്ധനത്തിന് പോകാന് പറ്റാത്ത സാഹചര്യത്തില് സംസ്ഥാന സര്ക്കാര് അനുവദിച്ച ഒരാഴ്ചത്തെ സൗജന്യ റേഷന് അടിയന്തിരമായി ലഭ്യമാക്കാന് മന്ത്രി ജില്ലാ കളക്ടര്ക്ക് നിര്ദ്ദേശം നല്കി.
