ശബരിമല: മണ്ഡലകാലത്ത് ശബരിമല ജോലിക്കെത്തുന്ന താല്ക്കാലിക ജീവനക്കാര് കിടക്കുന്നത് കാലിത്തൊഴുത്തിന് സമാനമായ സ്ഥലത്ത്. 68 ജീവനക്കാരാണ് വിവിധ ജോലികള്ക്കായി ശബരിമലയിലുള്ളത്. പത്തനംതിട്ട, ആലപ്പുഴ, കൊല്ലം, തിരുവനന്തപുരം, ഇടുക്കി എന്നീ ജില്ലകളില് നിന്നുള്ളവര്. കൂലി 400രൂപ മാത്രം. വിശ്രമം കുറവ്, പണി കൂടുതല്. വിശ്രമിക്കാന് നല്കിയിരിക്കുന്നത് രണ്ട് കുടുസു മുറികള്.
അരിയും ശര്ക്കരയും അടക്കമുള്ള സാധനങ്ങള് തലച്ചുമടായി എത്തിക്കുക, ഭണ്ഡാരങ്ങളില് ഭക്തര് നിക്ഷേപിക്കുന്ന അരി തിടപ്പള്ളിയില് എത്തിക്കുക തുടങ്ങിയ ജോലികളാണ് ഇവര്ക്ക്. പമ്പയില് നിന്നുള്ള ലോഡ് കയറ്റി വിടുന്നതും, പുലര്ച്ചെ മൂന്നര മുതല് പതിനൊന്നര വരെ നെയ്യഭിഷേക സമയത്ത് ശ്രീകോവിലിലെ ആടിയ ശിഷ്ടം നെയ്യ് ദേവസ്വം ആഫീസില് എത്തിക്കുന്നതും ഇവരാണ്.
പതിനെട്ടാംപടിക്ക് താഴെയുള്ള കെട്ടിടത്തിന്റെ അഞ്ചാം നിലയിലെ അപ്പം, അരവണ നിര്മ്മാണ പ്ലാന്റിലേക്ക് ശര്ക്കരയും അരിയും തലച്ചുമടായി എത്തിക്കുന്നതും ഇവര്. സന്നിധാനത്ത് നിന്ന് 11 കിലോമീറ്റര് ദൂരമുള്ള കുന്നാര്, 12 കിലോമീറ്റര് ദൂരമുള്ള ചെക്ക്ഡാം എന്നിവിടങ്ങളിലെ പോലീസ് ക്യാമ്പുകളിലേക്ക് പലവ്യഞ്ജനം തലച്ചുമടായി എത്തിക്കുന്നതും ഇവര്. കഴിഞ്ഞ മണ്ഡലകാലത്ത് തമിഴ്നാട്ടുകാരുമെത്തി. എന്നാല് മതിയായ വേതനം കിട്ടാത്തതിനാല് ഇക്കുറി അവരില്ല. ഓരോ സീസണിലും ശമ്പളം കൂട്ടുമെന്ന് പറഞ്ഞെങ്കിലും ഇത്തവണയാണ് അമ്പത് രൂപ വര്ദ്ധിപ്പിച്ച് നാനൂറ് രൂപയാക്കിയത്.
