കൊച്ചി : അഖില കേസില് ഷെഫിന് ജെഹാന് വേണ്ടി ഹാജരായ അഭിഭാഷകന് നസീറിനെ പോലീസ് ചോദ്യം ചെയ്യും. ഇതേ കേസില് ഹൈക്കോടതിയില് ഹാജരായ സര്ക്കാര് അഭിഭാഷകന് നാരായണനെ ഭീഷണിപ്പെടുത്തിയ സംഭവത്തിലാണ് നടപടി. കേസ് തോല്ക്കാന് കാരണം സര്ക്കാര് അഭിഭാഷകന്റെ നിലപാടാണെന്ന് ആരോപിച്ചായിരുന്നു വധഭീഷണി.
പോപ്പുലര് ഫ്രണ്ട് നേതാവും ഷെഫീന് ജെഹാന്റെ അഭിഭാഷകനുമായ കെ.സി.നസീര് തനിക്കെതിരെ വധഭീഷണി മുഴക്കിയെന്ന മുതിര്ന്ന സര്ക്കാര് അഭിഭാഷകന് പി. നാരായണന്റെ പരാതിയിലാണ് നടപടി.
ഡിജിപിയുടെ നിര്ദ്ദേശ പ്രകാരം എറണാകുളം സെന്ട്രല് പോലീസ് കേസ് രജിസ്റ്റര് ചെയ്യുകയും അഡ്വ. പി. നാരായണന്റെ മൊഴി രേഖപ്പെടുത്തുകയും ചെയ്തിരുന്നു. ആര്എസ്എസ് ഏജന്റെന്നും, സംഘിയെന്നും അഭിസംബോധന ചെയ്യുന്ന ഫേസ്ബുക്ക് സന്ദേശത്തില് ബാക്കി വച്ചേക്കില്ലെന്ന തരത്തില് മുന്നറിയിപ്പും നല്കിയിട്ടുണ്ട്. ഇതിന് പിന്നാലെയാണ് നസീറിനെ ചോദ്യം ചെയ്യാനുള്ള നടപടികള് തുടങ്ങിയത്.
അതേസമയം അഖില വിഷയത്തില് കെ. സി. നസീര് പ്രകോപനപരമായ പ്രസ്താവനകളും ഭീഷണി മുഴക്കുന്നതും തുടരുകയാണെന്ന് പോലീസ് കണ്ടെത്തിയിട്ടുണ്ട്. നസീറിനെ കൂടാതെ നിരവധിയാളുകള് അഡ്വ.നാരായണനെതിരെ വധഭീഷണി മുഴക്കി രംഗത്ത് വന്നിരുന്നു. ഇതുമായി ബന്ധപ്പെട്ട എല്ലാ ഫെയ്സ്ബുക്ക് അക്കൗണ്ടുകളുടെയും വിവരങ്ങള് ആവശ്യപ്പെട്ട് പോലീസ് ഫെയ്സ്ബുക്ക് അധികൃതര്ക്ക് കത്തയച്ചിട്ടുണ്ട്.
