.
കഴക്കൂട്ടം: ചരിത്രമായ സ്റ്റേറ്റ് ബാങ്ക് ഓഫ് ട്രാവന്കൂറിന്റെ സാങ്കേതികമികവിനായുള്ള കേന്ദ്രം സ്ഥാപിക്കുക എന്ന ലക്ഷ്യത്തോടെ കഴക്കൂട്ടം ടെക്നോപാര്ക്ക് മൂന്നാംഘട്ട വികസന മേഖലയില് നിര്മിക്കാനുദ്ദേശിച്ച കേരളത്തിലെ ആദ്യ എസ്ബിറ്റി ഹബ്ബിന്റെ ഭാവി ആശങ്കയില്. വര്ഷങ്ങള്ക്ക് മുമ്പ് പദ്ധതിയുടെ പ്രാധാന്യം കണക്കിലെടുത്ത് ടെക്നോപാര്ക്ക് ഫെയ്സ് ത്രീയോട് ചേര്ന്ന് മൂന്നേക്കര് സ്ഥലം സര്ക്കാരിന്റെ അനുമതിയോടെ പാര്ക്ക് അധികൃതര് അനുവദിക്കുകയും റോഡ്, ഇലക്ട്രിസിറ്റി, വെള്ളം തുടങ്ങിയ അടിസ്ഥാനസൗകര്യങ്ങള് ഒരുക്കുകയും ചെയ്തിരുന്നു. ഹബ്ബിന്റെ നിര്മാണം ആരംഭിക്കാനിരിക്കെയായിരുന്നു ബാങ്കുകളുടെ ലയനം സംഭവിച്ചത്.
ബാങ്കുമായി ബന്ധപ്പെട്ട ഐറ്റി അധിഷ്ഠിത പ്രവര്ത്തനങ്ങളുടെയും അനുബന്ധസേവനങ്ങളുടെയും പ്രധാനകേന്ദ്രം എന്ന നിലയിലാണ് ഹബ്ബ് സ്ഥാപിക്കാന് തീരുമാനിച്ചത്. കൂടാതെ കേരളത്തിലെ എസ്ബിറ്റി ബാങ്കിംഗ് നെറ്റ്വര്ക്കുകളുടെ പ്രധാനസെര്വറും അനുബന്ധ പ്രവര്ത്തനങ്ങളുടെ ഏകോപനവും ഒരു സെന്ററില് മാത്രം കേന്ദ്രീകരിക്കുന്ന തരത്തിലാണ് ഹബ്ബ് വിഭാവനം ചെയ്തിരുന്നത്. മൂന്ന് ഘട്ടങ്ങളിലായി രണ്ട് ലക്ഷത്തി നാല്പതിനായിരം ചതുരശ്രഅടി വിസ്തീര്ണമുള്ള കെട്ടിടവും അനുബന്ധസൗകര്യങ്ങളും ഒരുക്കുമെന്നും പറഞ്ഞിരുന്നു. ആദ്യം 90 വര്ഷത്തെ പാട്ടത്തിനാണ് ഭൂമി കൈമാറാന് തീരുമാനിച്ചത്. പുതിയ സര്ക്കാര് നയം വന്നതോടെ പാട്ടക്കാലാവധി 30 വര്ഷമാക്കി 2014 ല് പുതിയ കരാര് ഒപ്പിട്ടു. എന്നാല് എസ്ബിറ്റി എസ്ബിഐയില് ലയിച്ചതോടെ പദ്ധതി ഉപേക്ഷിക്കുമോ എന്നാണ് ഇപ്പോഴത്തെ ആശങ്ക. പദ്ധതിക്ക് വേണ്ടി കുടിയിറക്കപ്പെട്ട തദ്ദേശവാസികളുടെ പുനരധിവാസം ഇനിയും നടപ്പിലായിട്ടില്ല. അനുവദിച്ച മൂന്ന് ഏക്കര് സ്ഥലം ചുറ്റുമതില് കെട്ടിത്തിരിച്ച് ഗേറ്റും സ്ഥാപിച്ചിട്ടുണ്ട്. മുന്വശത്ത് നിര്ദ്ദിഷ്ട എസ്ബിറ്റി ഹബ്ബ് എന്ന ബോര്ഡ് വച്ചിട്ടുണ്ട്. പാര്ക്ക് അധികാരികളോട് ഇതേക്കുറിച്ച് ആരാഞ്ഞപ്പോള് ലയനം സംബന്ധിച്ച പ്രശ്നങ്ങള് കാരണമാണ് പദ്ധതി യാഥാര്ഥ്യമാകാന് കാലതാമസം നേരിടുന്നതെന്നും ലയന ശേഷം എസ്ബിഐ ഉന്നതഉദ്യോഗസ്ഥര് പാര്ക്ക് അധികൃതരുമായി ബന്ധപ്പെട്ട് പദ്ധതിയുമായി മുന്നോട്ടുപോകാന് സന്നദ്ധത അറിയിച്ചിട്ടുള്ളതായും പറഞ്ഞു.
