ന്യൂദല്ഹി: ജമ്മു കശ്മീരിലെ വൈഷ്ണോ ദേവി ക്ഷേത്രത്തില് ദര്ശനത്തിന് 50,000 തീര്ത്ഥാടകരെ മാത്രമെ അനുവദിക്കാന് പാടുള്ളുവെന്ന് ദേശീയ ഹരിത ട്രൈബ്യൂണല് ഉത്തരവിട്ടു. അപ്രതീക്ഷിത ദുരന്ത സാഹചര്യങ്ങള് ഒഴിവാക്കുന്നതിനായിട്ടാണ് നടപടിയെന്നും ഉത്തരവില് പറയുന്നു.
ക്ഷേത്രത്തിലേയ്ക്കുള്ള പുതിയ പാത ഈ മാസം 24 തുറക്കും. ഈ പാത കാല്നട യാത്രക്കാര്ക്കും ബാറ്ററി കാറുകള്ക്കുമാത്രമായിട്ടുള്ളതാണെന്നും ട്രൈബ്യൂണല് പറഞ്ഞു. കുതിരകളെയും കഴുതകളെയും ഈ പാതയില് അനുവദിക്കില്ല. പഴയ പാതയിലും പടിപടിയായി ഇവയെ ഒഴിവാക്കും. കത്ര ടൗണിലോ ബസ് സ്റ്റോപ്പിലോ റോഡിലോ പരിസ്ഥിതിക്ക് കോട്ടം തട്ടുന്ന രീതിയിലുള്ള ഏതെങ്കിലും തരത്തിലുള്ള പ്രവര്ത്തനങ്ങള്ക്ക് 2000 രൂപ പിഴ ഈടാക്കും. 50,000ല് അധികം തീര്ത്ഥാടകരെ വൈഷ്ണോ ദേവി ക്ഷേത്രമേഖലയ്ക്ക് താങ്ങാനാവില്ലെന്ന് ട്രൈബ്യൂണല് ചെയര്പേഴ്സണ് ജസ്റ്റീസ് സ്വതന്ത്രര് കുമാറിന്റെ നേതൃത്വത്തിലുള്ള ബെഞ്ച് വ്യക്തമാക്കി.
ക്ഷേത്രമേഖലയില് വലിയതോതിലുള്ള മാലിന്യമാണെന്നും കുതിരകളെയും കഴുതകളെയും വിലക്കണമെന്നാവശ്യപ്പെട്ട് ഒരു പരിസ്ഥിതി പ്രവര്ത്തകന് നല്കിയ ഹര്ജിയിലാണ് നടപടി. 40 കോടി രൂപ ചെലവിലാണ് ക്ഷേത്രത്തിലേയ്ക്ക് പുതിയ പാത നിര്മ്മിച്ചിരിക്കുന്നത്.
