പത്തനാപുരം: ഉള്ളിവില ഉയരങ്ങളിലേക്ക് കുതിക്കുമ്പോള് സാധാരണക്കാരന് ആശ്വാസമായി ‘ഉള്ട്ടി’എത്തി. കഴിഞ്ഞ ആഴ്ച കിലോയ്ക്ക് 130 രൂപയായിരുന്ന ഉള്ളിക്ക് ഇന്നലെ 150 ആയി വര്ധിച്ചു. ഉള്ളിവില നാള്ക്കുനാള് ഉയരുമ്പോള് പകരക്കാരനായെത്തിയ ഉള്ട്ടി മലയോര മേഖലയിലും കളം പിടിച്ചിരിക്കുകയാണ്.
കാഴ്ചയില് ചെറിയ ഉള്ളിക്ക് സമാനമെങ്കിലും സവാള ഇനത്തില് പെട്ടതാണ് ഉള്ട്ടി. ഒറ്റ നോട്ടത്തില് ചെറിയ ഉള്ളിയെന്നേ പറയൂ. രണ്ടര കിലോ 100 രൂപയ്ക്കാണ് വില്ക്കുന്നത്. ഗുണത്തിലും രുചിയിലും സവാളയോട് സാമ്യം തോന്നും.
മൈസൂര് ഉള്ളി, സാമ്പാര് ഉള്ളി എന്നിങ്ങനെ വിവിധ പേരുകളിലും അറിയപ്പെടുന്നുണ്ട്. ആന്ധ്ര, മൈസൂരു എന്നിവിടങ്ങളില് നിന്നാണ് കൂടുതലായി ഇത് കൊണ്ടുവരുന്നത്. മഴ കാരണം കുറച്ചു മാസങ്ങളായി ഉള്ളിക്കൃഷിയില് വന് ഇടിവുണ്ടായതാണ് വിപണിയില് വില കുതിച്ചുയരാന് കാരണം.
ഈ സാഹചര്യത്തിലാണ് ഉള്ട്ടി മരയോര മേഖലയിലെ വിപണിയും കീഴടക്കിയത്. സാധാരണഗതിയില് ഉള്ട്ടിക്ക് അധികം ആവശ്യക്കാരുണ്ടാകാറില്ലെന്നും ഇപ്പോള് ചെറിയുള്ളിക്ക് വില കൂടിയപ്പോഴാണ് ആളുകള് കൂടിയതെന്ന് കച്ചവടക്കാര് പറഞ്ഞു.
പത്തനാപുരം, കൊട്ടാരക്കര, പുനലൂര്, അഞ്ചല് തുടങ്ങിയ മലയോര മേഖലയിലെ മാര്ക്കറ്റുകളില് ഉള്ട്ടിയാണ് ഇപ്പോള് താരം.
