തിരുവനന്തപുരം: ശ്രീപത്മനാഭസ്വാമി ക്ഷേത്രത്തില് ദര്ശനത്തിന് എത്തിയ ഭക്തനായ ഗണപതിഅയ്യരെ അസഭ്യം പറയുകയും ഭീഷണിപ്പെടുത്തുകയും ജാതിപ്പേര് പറഞ്ഞ് ആക്ഷേപിക്കുകയും ചെയ്ത മാനേജരുടെ നടപടിക്കെതിരെ കേരള ബ്രാഹ്മണസഭ പ്രതിഷേധിച്ചു. ഗണപതി അയ്യരുടെ പരാതിയുടെ അടിസ്ഥാനത്തില് ഫോര്ട്ട് പോലീസ് കേസ് രജിസ്റ്റര് ചെയ്ത അന്വേഷണം നടത്തിവരുന്നു. ഒക്ടോബര് 31 ന് കേരള ബ്രാഹ്മണസഭയുടെ ജില്ലാ നേതൃത്വം ക്ഷേത്രത്തിലെ താത്കാലിക ഭരണസമിതി ചെയര്മാനെ കണ്ട് നിവേദനം നല്കുകയും കുറ്റക്കാര്ക്കെതിരെ മാതൃകാപരമായി നടപടി സ്വീകരിക്കണമെന്ന് ആവശ്യപ്പെടുകയും ചെയ്തിരുന്നു.
എന്നാല് നാളിതുവരെയായി കുറ്റാരോപിതനായ ഉദ്യോഗസ്ഥനെതിരെ നടപടി സ്വീകരിക്കുന്നതിനോ പദവിയില് നിന്ന് മാറ്റിനിര്ത്തി നിഷ്പക്ഷമായി അന്വേഷണം നടത്തുന്നതിനോ ഭരണസമിതി തയ്യാറായിട്ടില്ല. പ്രധാനപ്പെട്ട വഴിപാടുകള് നടത്തുന്ന ഭക്തജനങ്ങള്ക്ക് ഭഗവത് ദര്ശനം ചെയ്യാനുള്ള അവകാശത്തെ നിഷേധിച്ച് ചില അധികാരികള് എല്ലാ വ്യവസ്ഥകളും ലംഘിച്ച് തന്നിഷ്ടപ്രകാരം പ്രവര്ത്തിക്കുന്നത് ക്ഷേത്രത്തില് ഗുരുതരമായ സ്ഥിതിവിശേഷമാണ് ഉണ്ടാക്കിയിരിക്കുന്നത്.
ക്ഷേത്രത്തില് അടിയന്തരമായി നടത്തേണ്ട പ്രവര്ത്തികളെ സംബന്ധിച്ച് സുപ്രീംകോടതി പുറപ്പെടുവിച്ച നിര്ദ്ദേശങ്ങള് സമയബന്ധിതമായി നടപ്പാക്കാന് സാധിക്കാത്ത ഭരണസമിതി ക്ഷേത്രാചാരങ്ങള് ലംഘിച്ചുകൊണ്ട് പുതിയ പരിഷ്കാരങ്ങള് നടപ്പാക്കാന് ശ്രമിക്കുന്നത് അംഗീകരിക്കാനാകില്ല. ഭരണസമിതി ഇത്തരം സമീപനം തുടരുന്നപക്ഷം ഭക്തജനങ്ങളെ അണിനിരത്തി പ്രക്ഷോഭം നടത്തുമെന്ന് ബ്രാഹ്മണസഭ ഭാരവാഹികള് അറിയിച്ചു.
