തിരുവനന്തപുരം: സര്ക്കാര് അധീനതയിലുള്ള മഹാകവി കുമാരനാശാന്റെ ഭവനത്തെയും സ്മാരകത്തെയും തകര്ക്കാന് നീക്കം. തോന്നയ്ക്കല് ആശാന് സ്മാരകത്തിന്റെ വികസനത്തിനായി നടപടി ക്രമങ്ങള് പൂര്ത്തിയാക്കി സര്ക്കാര് ഏറ്റെടുക്കാന് തീരുമാനിച്ച ഭൂമി മാര്ബിള് കമ്പനി കൈയ്യടക്കി നിര്മാണ പ്രവര്ത്തനങ്ങള് ആരംഭിച്ചതോടെ മഹാകവിയുടെ മണ്വീട് ഏതു നിമിഷവും തകര്ന്നു വീഴുമെന്ന അവസ്ഥയിലായി.
ആശാന്സ്മാരകത്തിനുവേണ്ടി 1.80 ലക്ഷം ചെലവഴിച്ച് 1.10 ഹെക്ടര് ഭൂമി ഏറ്റെടുക്കുന്നതിനുള്ള നടപടിക്രമങ്ങള് നടന്നു വരികയാണ്. ഈ ഭൂമി സംബന്ധിച്ച് ഹൈക്കോടതിയില് കേസും നിലനില്ക്കുന്നുണ്ട്. എന്നാല് സമീപത്തെ മറ്റ് ഭൂമിയോടൊപ്പം ആശാന് സ്മാരകത്തിനുള്ള ഭൂമികൂടി കൈവശപ്പെടുത്തിയാണ് മാര്ബിള് കമ്പനി നിര്മാണപ്രവര്ത്തനങ്ങള് ആരംഭിച്ചത്. സ്മാരകത്തിനു സമീപം നിന്ന വൃക്ഷങ്ങള് മുറിച്ചുമാറ്റിയ ശേഷം സ്മാരകത്തിനു സംരക്ഷണമായി നിര്മിച്ച മതിലിനു സമീപത്തുകൂടി റോഡും നിര്മിച്ചു. പഞ്ചായത്തിന്റ അനുമതി ഇല്ലാതെയാണ് നിര്മാണപ്രവര്ത്തനങ്ങള് നടത്തിയത്.
ഗ്രാനൈറ്റ് മുറിക്കുന്നതിനുള്ള കൂറ്റന് യന്ത്രങ്ങള് കണ്ടെയ്നര് ലോറിയില് ഇതുവഴി കൊണ്ടുപോയതോടെ ആശാന്റെ വീടിന് ആഘാതമേറ്റു. മാര്ബിള് കമ്പനി പൂര്ണതോതില് പ്രവര്ത്തിച്ചു തുടങ്ങിയാല് ഗ്രാനൈറ്റുമായി കൂറ്റന്ലോറികള് ഇതുവഴി കടന്നു പോകും. അതോടെ ആശാന്റെ വീട് നിലം പൊത്തും. കൂടാതെ ഗ്രാനൈറ്റ് മുറിക്കുന്നപൊടി പ്രദേശമെങ്ങും വ്യാപിക്കുന്നതോടെ സ്മാരകവും പൂന്തോട്ടവും നശിക്കും.
കുമാരനാശാന് ദേശീയസാംസ്കാരിക ഇന്സ്റ്റിറ്റ്യൂട്ട് മംഗലപുരം ഗ്രാമപഞ്ചായത്തിനു നല്കിയ പരാതിയെ തുടര്ന്ന് നിര്മാണപ്രവര്ത്തനങ്ങള് നിര്ത്തിവയ്ക്കണമെന്ന് ആവശ്യപ്പെട്ട് മാര്ബിള് കമ്പനിക്ക് നോട്ടീസ് നല്കി. നിര്ത്തിവച്ചില്ലെങ്കില് വാഹനങ്ങള് തടയാന് തങ്ങള് നിര്ബന്ധിതരാകുമെന്ന് ഇന്സ്റ്റിറ്റ്യൂട്ട് ഡയറക്ടര് കവി മധുസൂദനന്നായര് വാര്ത്താസമ്മളനത്തില് പറഞ്ഞു. മുഖ്യമന്ത്രിക്കും സാംസ്കാരികമന്ത്രിക്കും ഇതു സംബന്ധിച്ച് പരാതി നല്കുമെന്നും അദ്ദേഹം അറിയിച്ചു. ഇന്സ്റ്റിറ്റ്യൂട്ട് സെക്രട്ടറി പ്രൊഫ. അയിലം ഉണ്ണികൃഷ്ണന്, അഡ്മിനിസ്ട്രേറ്റീവ് ഓഫീസര് സലിംകുമാര് എന്നിവരും വാര്ത്താസമ്മേളനത്തില് സംബന്ധിച്ചു.
