കുന്നത്തൂര്: കയ്യേറ്റക്കാരെ ഒഴിപ്പിച്ച് അളന്നുതിരിച്ച് ദേവസ്വംബോര്ഡിന് കൈമാറിയ ചക്കുവള്ളി പരബ്രഹ്മഭൂമിയില് ക്ഷേത്രത്തിന് മതില് കെട്ടാനുള്ള അനുമതി വൈകുന്നതിനെതിരെ ഉപദേശകസമിതിയും ഭക്തജന സമിതിയും പ്രതിഷേധത്തിലേക്ക്.
പരബ്രഹ്മഭൂമിയില് മതില്കെട്ടാനുള്ള നടപടിക്ക് സ്റ്റോപ്പ് മെമ്മോ നല്കിയ ശൂരനാട്, പോരുവഴി ഗ്രാമപഞ്ചായത്ത് സെക്രട്ടറിമാരുടെ നടപടി പ്രതിഷേധാര്ഹമാണ്. ഇതിനുപിന്നില് ഭരണകക്ഷിയിലെ ചില തല്പ്പരകക്ഷികളാണെന്നും ഉപദേശകസമിതി ആരോപിക്കുന്നു.
ഇവരുടെ ഇടപെടലിനെ തുടര്ന്നാണ് പണി തുടങ്ങാന് തൊഴിലാളികള് എത്തുന്നതിനു മുമ്പായി പഞ്ചായത്ത് ജീവനക്കാര് സ്റ്റോപ്പ് മെമ്മോ നല്കാനെത്തിയതെന്ന് ആക്ഷേപമുണ്ട്.
മതില് കെട്ടാന് അനുമതി നല്കാതെ നീട്ടികൊണ്ടുപോകുന്നതായി ആരോപിച്ച് ഉപദേശകസമിതിയുടെയും ഭക്തജനങ്ങളുടെയും നേതൃത്വത്തില് ശൂരനാട്, പോരുവഴി പഞ്ചായത്ത് സെക്രട്ടറിമാരെ ഉപരോധിച്ചു.
രണ്ട് ദിവസത്തെ സാവകാശത്തില് അസിസ്റ്റന്റ് എഞ്ചിനീയറുടെ സ്ഥലപരിശോധന കഴിഞ്ഞാലുടന് അനുമതി നല്കാന് കഴിയുമെന്ന് സെക്രട്ടറിമാര് ഉറപ്പുനല്കിയതിനെ തുടര്ന്നാണ് ഉപരോധം അവസാനിപ്പിച്ചത്.
