ഇന്ഡോര്: ഹിന്ദുസ്ഥാന് എന്നത് ഹിന്ദുക്കളുടെ രാജ്യമാണ്.എന്നാല് അത് മറ്റുള്ളവരുടേതല്ലെ എന്ന് അര്ത്ഥമാക്കുന്നില്ലെന്ന് ആര്എസ്എസ് സര്സംഘചാലക് ഡോ. മോഹന് ഭാഗവത്. ഇന്ഡോറില് ആര്എസ്എസ് പ്രവര്ത്തകരെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.
ജര്മ്മനി ജര്മ്മന്കാരുടെ രാജ്യമാണ്. ബ്രിട്ടണ് ബ്രിട്ടീഷുകാരുടേതാണ്. അമേരിക്ക അമേരിക്കക്കാരുടേതും. അങ്ങനെ വരുമ്പോള് ഹിന്ദുസ്ഥാന് ഹിന്ദുക്കളുടേതാണ്. അതിനര്ത്ഥം മറ്റുള്ളവരുടേതല്ല എന്നല്ല- ഭഗവത് പറഞ്ഞു. ഇന്ത്യന് സംസ്കാരവുമായി പൊരുത്തപ്പെട്ടു ജീവിക്കുന്നവരും ഇന്ത്യന് പൂര്വികരുടെ പിന്തുടര്ച്ചക്കാരും ഭാരത മാതാവിന്റെ മക്കളും എല്ലാം ഹിന്ദു എന്ന സംജ്ഞക്കുള്ളില് നിന്നുള്ളവരാണെന്നും ഭാഗവത് പറഞ്ഞു.
സര്ക്കാര് മാത്രം വിചാരിച്ചാല് വികസനം കൊണ്ടുവരാന് കഴിയില്ല. അതിന് സമൂഹത്തില് കൂടി മാറ്റം വരണം. പണ്ടുകാലത്ത് ജനങ്ങള് വികസനത്തിനായി ദൈവത്തെയായിരുന്നു സമീപിച്ചിരുന്നത്. എന്നാല് ഇന്ന് കലിയുഗത്തില് സര്ക്കാരിനേയാണ് വികസനത്തിനായി ആശ്രയിക്കുന്നത്. എന്നാല് സര്ക്കാര് മാത്രം വിചാരിച്ചാല് വികസനം കൊണ്ടുവരാനാകില്ല- അദ്ദേഹം പറഞ്ഞു.അതിന് മാറ്റം ആവശ്യമാണ്.
സമൂഹത്തെ അതിനു വേണ്ടി നാം ഒരുക്കിയെടുക്കണം. സമൂഹം സര്ക്കാരിന്റെ പിതാവാണ്. സര്ക്കാര് സമൂഹത്തെ സേവിക്കുകയാണ് ചെയ്യുന്നത്. സര്ക്കാരിന് സമൂഹത്തെ മാറ്റാനാകില്ല. സമൂഹം സ്വയം മാറുമ്പോള് അത് സര്ക്കാരിലും പ്രതിഫലിക്കുമെന്നും അദ്ദേഹം പറഞ്ഞു.
