അമ്പലപ്പുഴ: അമ്പലപ്പുഴ കണ്ണന്റെ ഗാനം ആലപി ച്ച, മുന് ഇന്ത്യന് ക്രിക്കറ്റ് ക്യാപ്റ്റന് മഹേന്ദ്രസിങ് ധോണിയുടെ മകള് രണ്ടു വയസുകാരി സിവയ്ക്ക് കണ്ണനെ ദര്ശിക്കാന് ക്ഷണം. അദ്വൈതം സിനിമയിലൂടെ ഭക്തരുടെ മനസ്സ് കീഴടക്കിയ ‘അമ്പലപ്പുഴ ഉണ്ണിക്കണ്ണനോട് നീ…’ എന്നുതുടങ്ങുന്ന ഗാനം അന്യസംസ്ഥാനക്കാരികൂടിയായ സിവ പാടിയത് സോഷ്യല് മീഡിയയില് വൈറലായിരുന്നു. ഇന്സ്റ്റഗ്രാമില് പോസ്റ്റു ചെയ്ത ഗാനം 14 മണിക്കൂറിനുള്ളില് ഒന്നേകാല് ലക്ഷം പേരാണ് ലൈക്ക് ചെയ്തത്. യൂട്യൂബിലും ലക്ഷക്കണക്കിനു പേര് സിവയുടെ ഗാനം ആസ്വദിച്ചു.
ഭാഷകളില് പഠിക്കാന് ഏറെ ബുദ്ധിമുട്ടുള്ള മലയാളം രണ്ടു വയസ്സു മാത്രം പ്രായമുള്ള സിവ പാടിയത് കണ്ണന്റെ അനുഗ്രഹം കൊണ്ടാണ്. ഗാനാലാപനത്തിന് ഉപദേശക സമിതി അഭിനന്ദനവും അറിയിക്കും. അടുത്ത ഉത്സവത്തിന് സിവയെ യും കുടുംബത്തെയും ക്ഷേത്രത്തിലേക്ക് ക്ഷണിക്കാനാണ് ക്ഷേത്ര ഉപദേശക സമിതിയുടെ തീരുമാനം. ക്ഷണിച്ചുകൊണ്ട് ധോണിക്ക് ഇന്ന് മെയില് അയയ്ക്കും.
ക്ഷേത്ര ഉത്സവങ്ങളില് പ്രധാനമായ പന്ത്രണ്ട് കളഭനാളുകളില് എത്തണമെന്നാണ് ഉപദേശക സമിതി ആഗ്രഹിക്കുന്നത്. ആദ്യദിവസമായ ശങ്കരനാരായണ കലോത്സവത്തിലോ പത്താം നാളിലെ സംഗീതോത്സവത്തിലോ ധോണിയും കുടുംബവും എത്തണമെന്നാണ് ഭക്ത രുടെ ആഗ്രഹമെന്ന് ഉപദേശക സമിതി പ്രസിഡന്റ് കൊട്ടാരം ഉണ്ണികൃഷ്ണനും സെക്രട്ടറി ശ്രീകുമാര് തത്തമത്തും പറഞ്ഞു.
ഇതിനു മുമ്പ് കണ്ണന്റെ ഇഷ്ടനിവേദ്യമായ അമ്പലപ്പുഴ പാല്പ്പായസം ധോണിയുടെ വീട്ടില് എത്തിക്കും. സിവയെ പാട്ടു പഠിപ്പിച്ച പരിചാരികയെയും ഇവരോടൊപ്പം എത്തുവാന് ക്ഷണിക്കുമെന്നും ഉപദേശക സമിതി അംഗങ്ങള് പറഞ്ഞു.
