കോഴിക്കോട്: ചലച്ചിത്ര ലോകത്തേക്ക് മടങ്ങിവരണമെന്ന ആഗ്രഹം മനസ്സില് നില്ക്കെയാണ് ഐ.വി. ശശിയുടെ വിടപറയലെന്ന് സഹോദരന് ഐ.വി. ശശാങ്കന് പറയുന്നു.
ഗള്ഫ് യുദ്ധം സംബന്ധിച്ച ഒരു ബൃഹത് ചലച്ചിത്രം ചെയ്യാനുള്ള ഒരുക്കത്തിലായിരുന്നുവെന്ന് പറഞ്ഞിരുന്നു. അത് എത്രയും പെട്ടെന്ന് പൂര്ത്തിയാക്കണമെന്നതായിരുന്നു ആഗ്രഹം.
ഇത്ര വലിയ ചിത്രം ചെയ്യാന് ആരോഗ്യം അനുവദിക്കുമോ എന്ന തന്റെ ചോദ്യത്തിന് തീര്ച്ചയായും കഴിയുമെന്ന മറുപടിയാണ് അദ്ദേഹം നല്കിയതെന്നും ശശാങ്കന് ഓര്ക്കുന്നു.
ഗോകുലം ഗ്രൂപ്പിന്റെ ഒരു ചിത്രം സംവിധാനം ചെയ്യുന്നതിനും അദ്ദേഹം തീരുമാനിച്ചിരുന്നു.
ഇടയ്ക്ക് ശാരീരികാസ്വാസ്ഥ്യം കൂടിയതോടെയാണ് പുതിയ പടങ്ങള് ചെയ്യുന്നത് നിര്ത്തിയത്. ആരോഗ്യ പ്രശ്നങ്ങള് ഉണ്ടായിരുന്നുവെങ്കിലും യാത്രകളെ അദ്ദേഹം എന്നും ഇഷ്ടപ്പെട്ടിരുന്നതായും ശശാങ്കന് കൂട്ടിച്ചേര്ത്തു.
കഴിഞ്ഞ ഓണത്തിനാണ് ഐ.വി. ശശിയും ഭാര്യ സീമയും അവസാനമായി കോഴിക്കോട്ടെത്തിയത്. അന്ന് കുടുംബാംഗങ്ങളോടൊപ്പം ഒന്നിച്ചിരുന്ന് ഓണ സദ്യയുണ്ടു.
സംവിധായകന്റെ പേരു നോക്കി സിനിമ കാണാന് പോകുന്ന ഒരു രീതി മലയാള പ്രേക്ഷകരില് രൂപപ്പെട്ടത് ഐ.വി. ശശിയുടെ സിനിമകളുടെ വരവോടെയാണെന്ന് പറയാം.
സിനിമ സംവിധായകന്റെ സൃഷ്ടിയാണെന്ന് അദ്ദേഹം തന്റെ ചിത്രങ്ങളിലൂടെ തെളിയിച്ചു.
സ്ക്രിപ്റ്റ് മുതല് എഡിറ്റിംഗ് വരെയുള്ള എല്ലാ പ്രവര്ത്തികള്ക്കും അദ്ദേഹം നേരിട്ട് നേതൃത്വം നല്കുകയും ചെയ്തിരുന്നു.
