കേരളത്തിന് രണ്ട് പുതിയ ട്രെയിനുകള്‍; റെയില്‍വേ സമയപട്ടിക നവംബര്‍ ഒന്നിന്

കൊച്ചി: നവംബര്‍ ഒന്നിന് വരുന്ന റെയില്‍വേയുടെ പുതിയ സമയപട്ടികയില്‍ കേരളത്തിന് രണ്ട് പുതിയ ട്രെയിനുകള്‍ ലഭിക്കും. ഗാന്ധിധാം-തിരുവനന്തപുരം ഹംസഫര്‍ എക്‌സ്പ്രസ്, മംഗളുരു-കൊച്ചുവേളി അന്ത്യോദയ എക്സ്പ്രസ് എന്നിവയാണ് ലഭിക്കുന്നത്.

ത്രീ ടയര്‍ എസി മാത്രമുള്ള ഹംസഫര്‍ എക്സ്പ്രസ് തിങ്കളാഴ്ച ഉച്ചയ്‌ക്ക് 1.50ന് ഗാന്ധിധാമില്‍ നിന്നു പുറപ്പെട്ട് ബുധനാഴ്ച രാവിലെ 11.30ന് തിരുനെല്‍വേലിയില്‍ എത്തും. ബുധനാഴ്ച വെളുപ്പിന് 4.10ന് കൊച്ചിയിലെത്തുന്ന വണ്ടി 7.50ന് തിരുവനന്തപുരത്തെത്തും. വ്യാഴാഴ്ച രാവിലെ 7.45ന് തിരുവനെല്‍വേലിയില്‍ നിന്നു പുറപ്പെടും. 10.50നു തിരുവനന്തപുരത്തും 2.50നു കൊച്ചിയിലും എത്തും. ശനിയാഴ്ച രാവിലെ 4.40ന് ഗാന്ധിധാമിലെത്തും.

സര്‍വീസ് തുടങ്ങുന്ന തീയതിയായിട്ടില്ല. പൂര്‍ണമായും അണ്‍റിസര്‍വഡ് ആയ 18 കോച്ചുകളുള്ള അന്ത്യോദയ എക്സ്പ്രസ് വെള്ളി, ഞായര്‍ ദിവസങ്ങളില്‍ മംഗളൂരുവില്‍ നിന്നും വ്യാഴം, ശനി ദിവസങ്ങളില്‍ കൊച്ചുവേളിയില്‍ നിന്നും പുറപ്പെടും. വൈകിട്ട് എട്ടിന് മംഗളൂരുവില്‍ നിന്നു പുറപ്പെട്ട് പിറ്റേന്നു രാവിലെ 8.15നു കൊച്ചുവേളിയിലും. രാത്രി 9.25നു കൊച്ചുവേളിയില്‍ നിന്നു പുറപ്പെട്ട് പിറ്റേന്നു രാവിലെ 9.15ന് മംഗളൂരുവിലും എത്തും.

കാസര്‍കോട്, കണ്ണൂര്‍, കോഴിക്കോട്, ഷൊര്‍ണൂര്‍, തൃശൂര്‍, എറണാകുളം, ആലപ്പുഴ, കൊല്ലം എന്നിവിടങ്ങളിലാണ് സ്റ്റോപ്പുള്ളത്.

നീട്ടുന്ന ട്രെയിനുകള്‍

കണ്ണൂര്‍-ആലപ്പുഴ എക്സ്‌ക്യൂട്ടീവ് എക്സ്പ്രസ് എല്ലാ ദിവസവും ആലപ്പുഴ വരെ സര്‍വീസ് നടത്തും.

തിരുവനന്തപുരം-പാലക്കാട് അമൃത എക്സ്പ്രസ് മധുരയിലേക്ക്. 10.30നു തിരുവനന്തപുരത്തു നിന്നു പുറപ്പെട്ട് 7.50നു പാലക്കാടും 1.10നു മധുരയിലും എത്തും. 3.45നു മധുരയില്‍ നിന്നു പുറപ്പെട്ട് 9.20നു പാലക്കാടും പിറ്റേന്ന് രാവിലെ 6.25നു തിരുവനന്തപുരത്തും എത്തും. പൊള്ളാച്ചി, പഴനി, ഡിണ്ടിഗല്‍ മാത്രമാണ് സ്റ്റോപ്പുകള്‍.

ചെന്നൈ സെന്‍ട്രല്‍-പഴനി സൂപ്പര്‍ഫാസ്റ്റ് പൊള്ളാച്ചി വഴി പാലക്കാട്ടേക്ക് 31ന് സര്‍വീസ് ആരംഭിക്കും. പഴനി-പാലക്കാട് റൂട്ടില്‍ എക്സ്പ്രസ് ട്രെയിനാകും. രാത്രി 9.40നു ചെന്നൈയില്‍ നിന്നു പുറപ്പെട്ടു രാവിലെ 11നു പാലക്കാടും വൈകിട്ടു മൂന്നിന് തിരിച്ചു രാവിലെ 4.15നു ചെന്നൈയിലും എത്തും. പഴനി-പാലക്കാട് റൂട്ടില്‍ ഉദുമല്‍പേട്ട, പൊള്ളാച്ചി, കൊല്ലങ്കോടു സ്റ്റോപ്പുകള്‍.

ചെന്നൈ എഗ്മോര്‍-തിരുവനന്തപുരം അനന്തപുര എക്സ്പ്രസ് കൊല്ലത്തേക്ക്. ദിവസവും 7.50നു എഗ്മോറില്‍ നിന്നു പുറപ്പെട്ട് 11.45 നു തിരുവനന്തപുരത്തും ഒരു മണിക്ക് കൊല്ലത്തും എത്തും. തിരിച്ച് മൂന്നിനു പുറപ്പെട്ട് അടുത്ത ദിവസം എട്ടിനു എഗ്മോറിലെത്തും. വര്‍ക്കലയില്‍ സ്റ്റോപ്പുണ്ട്.

വേഗത കൂട്ടുന്ന ട്രെയിനുകള്‍, സമയലാഭം എന്ന ക്രമത്തില്‍

പരശുറാം എക്സ്പ്രസ്- 25 മിനിറ്റ്,

ഏറനാട്- 15 മിനിറ്റ്,

അനന്തപുരി എക്സ്പ്രസ്- 20 മിനിറ്റ്,

എറണാകുളം- ഗുരുവായൂര്‍ 10 മിനിറ്റ്,

എറണാകുളം- പാലക്കാട് 20 മിനിറ്റ്,

കായംകുളം- എറണാകുളം പാസഞ്ചര്‍ 10 മിനിറ്റ്.