കോട്ടയം: സംസ്ഥാനത്ത് അഭ്യസ്തവിദ്യര് അനുഭവിക്കുന്ന തൊഴിലില്ലായ്മയുടെ രൂക്ഷത പ്രകടമാക്കുന്നതായിരുന്നു ഇന്നലെ കോട്ടയം സിഎംഎസ് കോളേജില് നടന്ന മെഗാ ജോഫ് ഫെയറില് കണ്ടത്. ഒരു ദിവസത്തെ പരിപാടിയില് എത്തിച്ചേര്ന്നത് കാല്ലക്ഷത്തില്പ്പരം പേര്.
കേന്ദ്രസര്ക്കാരിന്റെ ലേബര് എംപ്ലോയ്മെന്റ്് വിഭാഗം കൊച്ചിയിലെ സൊസൈറ്റി ഫോര് ഇന്റഗ്രേറ്റഡ് ഗ്രോത്ത് ഓഫ് ദി നേഷന്(എസ്ഐജിഎന്),കേരള ചേമ്പര് ഓഫ് കോമേഴ്സ് ആന്ഡ് ഇന്ഡസ്ട്രിയും സംയുക്തമായിട്ടാണ് മെഗാ ജോബ് ഫെയര് സംഘടിപ്പിച്ചത്. പലരും പ്രത്യേക രജിസ്ട്രേഷന് ഫീസ് ഏര്പ്പെടുത്തി മെഗാ ഫെയര് നടത്തുമ്പോള് തീര്ത്തും സൗജന്യമായി രജിസ്റ്റര് ചെയ്ത് അഭിമുഖങ്ങളില് പങ്കെടുക്കാന് ഉദ്യോഗാര്ത്ഥികള്ക്ക് അവസരമൊരുക്കിയത് ഏറെ ആശ്വാസമായി.
് 27000 യുവതീ യുവാക്കളാണ് തൊഴില് തേടി ജോബ് ഫെയറില് രജിസ്റ്റര് ചെയ്തത്. ഇവരില് നിന്ന് 2924 പേരെ വിവിധ കമ്പിനികള് ഷോര്ട്ട് ലിസ്റ്റ് ചെയ്തു. 60ഓളം സ്വകാര്യ കമ്പനികള് തൊഴില് ദാതാക്കളായി. ജോബ് ഫെയറിലെത്തിയവര്ക്ക് കേന്ദ്ര സര്ക്കാരിന്റെ കീഴിലുള്ള കൊച്ചിന് ഷിപ്പ്യാര്ഡ്, ബിഎസ്എന്എല് എന്നീ കമ്പനികളും ഫീല്ഡ് പബ്ലിസിറ്റിയും തൊഴില് തേടിയെത്തിയവര്ക്ക് മാര്ഗ്ഗ നിര്ദേശങ്ങളുമായി എത്തിയിരുന്നു. വിവിധങ്ങളായ 3000 ഒഴുവുകളിലേക്കാണ് കമ്പനികള് മുഖാമുഖം നടത്തിയത്. 8-ാം ക്ലാസ് മുതല് ബിരുദാന്തര ബിരുദം നേടിയവര് വരെയാണ് തൊഴില് തേടിയെത്തിയത്.
ഇതോടനുബന്ധിച്ച് നടന്ന പൊതുസമ്മേളനം കാഞ്ഞിരപ്പള്ളി അതിരൂപത ബിഷപ്പ് മാര് മാത്യു അറക്കല് ഉദ്ഘാടനം ചെയ്തു. സൊസൈറ്റി ഫോര് ഇന്റഗ്രറ്റഡ് ഗ്രോത്ത് ഓഫ് ദി നേഷന് പ്രസിഡന്റ് എ.എന്. രാധാകൃഷ്ണന് അദ്ധ്യക്ഷനായി. 35000 പേര്ക്ക് ഇതിനോടകം തൊഴില് നല്കുവാന് കഴിഞ്ഞുവെന്നും 44 തൊഴില് മേഖലകളിലായി ഒരു ലക്ഷം പേര്ക്ക് തൊഴില് നല്കുമെന്നും അദ്ദേഹം പറഞ്ഞു.സ്വകാര്യ മേഖലയുടെ സഹകരണത്തോടെ സ്കില് ഡവലപ്മെന്റ്്് യോജനയിലൂടെ തൊഴില് പരിശീലനം നല്കും.നവംബര് 6 മുതല് 12 വരെ തൃശ്ശൂരില് കൃത്രിമ അവയവ നിര്മ്മാണ പരിശീലനം കേന്ദ്ര സര്ക്കാരിന്റെ സഹായത്തോടെ നടത്തും. ആവാസ് യോജനയുമായി ബന്ധപ്പെട്ട് കൊച്ചിയില് മെഗാ സബ്മീറ്റ് പ്രമുഖരുടെ സഹായത്തോടെ നടത്തുമെന്നും പ്രധാനമന്ത്രി പങ്കെടുക്കുമെന്നു പ്രതീക്ഷിക്കുന്നതായും അദ്ദേഹം പറഞ്ഞു. തിരുവഞ്ചൂര് രാധാകൃഷ്ണന് എംഎല്എ മുഖ്യപ്രഭാഷണം നടത്തി.കൊച്ചിന് ഷിപ്പ്യാര്ഡ് ഡയറക്ടര് ബി.രാധാകൃഷ്ണമേനോന്, ബിജെപി ജില്ലാ പ്രസിഡന്റ് എന്.ഹരി, സൈന് മെമ്പര് എന്.റെജി,യുവമോര്ച്ച ജില്ലാ പ്രസിഡന്റ് അഖില് രവീന്ദ്രന്,നഗരസഭാഗം രാധാകൃഷ്ണന് കോയിക്കല്, സബ്ബ് റീജിയനല് എംപ്ലോയ്മെന്റ് ഓഫീസറും കേന്ദ്രസര്ക്കാരിന്റെ ലേബര് എംപ്ലോയ്മെന്റ് മെമ്പറുമായ പി.ജി.രാമചന്ദന്,സൈന് പ്രതിനിധി രൂപേഷ് എന്നിവര് പ്രസംഗിച്ചു.
