കണ്ണൂര്: ജനമിത്രം ജനകീയ നീതിവേദി നീതിനിഷേധങ്ങള്ക്കെതിരെ ജനകീയ പ്രതികരണ യാത്ര നടത്തുന്നു. സ്ത്രീ സംരക്ഷണ നിയമങ്ങളുടെ ദുരുപയോഗങ്ങള്ക്കെതിരെയും വയോജനങ്ങളുടെ സംരക്ഷണം സര്ക്കാര് ഉറപ്പുവരുത്തണമെന്നും ആവശ്യപ്പെട്ട് നടത്തുന്ന യാത്ര 23ന് കാസര്കോട് നിന്ന് ആരംഭിച്ച് 26 കോഴിക്കോട് സമാപിക്കും.
വര്ദ്ധിച്ചുവരുന്ന നീതി നിഷേധങ്ങള് തടയുക, സംസ്ഥാനത്തെ കുടുംബ കോടതിയുടെ പ്രവര്ത്തനങ്ങളെക്കുറിച്ച് ഹൈക്കോടതി അന്വേഷണം നടത്തുക, കുടുംബബന്ധങ്ങള് ശിഥിലമായിക്കൊണ്ടിരിക്കുന്ന സാഹചര്യത്തില് കുടുംബ സംരക്ഷണ നിയമങ്ങള് പാസാക്കുക, ഭരണ ഘടന അനുശാസിക്കുന്ന തുല്ല്യനീതി നടപ്പിലാക്കുക, നിയമങ്ങള് നിര്മ്മിക്കുമ്പോള് നിയമനിര്മ്മാണ സഭകള് സമഗ്രമായി ചര്ച്ചചെയ്ത് പാസാക്കുക, ഫാമിലി കമ്മീഷന് രൂപീകരിക്കുക, കോടതി ഭാഷ മലയാളത്തിലാക്കുക, വയോജനങ്ങളെ തെരുവുകളിലേക്കും അനാഥാലയങ്ങളിലേക്കും തള്ളിവിടുന്ന അവസ്ഥ വ്യാപകമായി കണ്ടുവരുന്നതിനാല് വയോജനങ്ങളുടെ സംരക്ഷണം സര്ക്കാര് ഉറപ്പുവരുത്തുക തുടങ്ങിയ ആവശ്യങ്ങളുന്നയിച്ചാണ് യാത്ര.
23ന് രാവിലെ 10മണിക്ക് സംസ്ഥാന പ്രസിഡണ്ട് എം.എ. ഇബ്രാഹിം റാവുത്തറിന്റെ അധ്യക്ഷതയില് പി.സി.ജോര്ജ്ജ് എംഎല്എ ഉദ്ഘാടനം ചെയ്യും. സംസ്ഥാന ജനറല് സെക്രട്ടറി ബൈജു ആറാഞ്ചേരിയാണ് ജാഥ നയിക്കുന്നത്. 23ന് തളിപ്പറമ്പ്, 24ന് ഇരിട്ടി, 25ന് കുറ്റിയാടി, 26ന് കോഴിക്കോടും ജാഥ സമാപിക്കും. സമാപന സമ്മേളനം മാമുക്കോയ ഉദ്ഘാടനം ചെയ്യും.
