കണ്ണൂര്: കണ്ണൂര് റവന്യൂ ജില്ലാ സ്കൂള് കായികമേള ഇന്നാരംഭിക്കും. പോലീസ് പരേഡ് ഗ്രൗണ്ടില് നടക്കുന്ന മത്സരങ്ങള് 17 ന് സമാപിക്കും. 15 സബ്ജില്ലകളില് നിന്ന് മൂന്നാം സ്ഥാനം വരെ ലഭിച്ച മത്സരാര്ത്ഥികളും രണ്ട് സ്പോര്ട്സ് സ്കൂളുകളായ ജിവിഎച്ച്എസ് സ്പോര്ട്സ് കണ്ണൂര്, സായി തലശ്ശേരി എന്നിവിടങ്ങളില് നിന്നും ഏകദേശം 2500ല് പരം മത്സരാര്ത്ഥികള് മേളയില് പങ്കെടുക്കും.
14ന് കാലത്ത് 8 മണിക്ക് വിദ്യാഭ്യാസ ഉപഡയറക്ടര് യു.കരുണാകരന് പതാക ഉയര്ത്തുന്നതോടെ മത്സരങ്ങള് ആരംഭിക്കും. തുടര്ന്ന് 9.30 ന് കണ്ണൂര് കോര്പ്പറേഷന് മേയര് ഇ.പി.ലത ഉദ്ഘാടനം ചെയ്യും. 14, 17, 18 വയസ്സിന് താഴെയുള്ള ആണ്കുട്ടികളുടെയും പെണ്കുട്ടികളുടെയും 118 മത്സരങ്ങള് മൂന്ന് ദിവസങ്ങളിലായി ഈ മേളയില് നടക്കും. ഒക്ടോബര് 20 മുതല് 23 വരെ കോട്ടയം പാലായില് നടക്കുന്ന സംസ്ഥാന അത്ലറ്റിക് മത്സരത്തില് പങ്കെടുക്കുവാന് ഈ മത്സരത്തില് നിന്നുള്ള വിജയികള് യോഗ്യത നേടും. സമാപന സമ്മേളനം 17ന് വൈകീട്ട് നാലിന് നടക്കും. പി.കെ.ശ്രീമതി എംപി സമ്മാനദാനം നിര്വ്വഹിക്കും.
