ന്യൂദല്ഹി: ആര്എസ്എസ്സിനെ വിമര്ശിക്കാനിറങ്ങി സ്വയം അപഹാസ്യനായി കോണ്ഗ്രസ് ഉപാധ്യക്ഷന് രാഹുല്. ആര്എസ്എസ് സ്ത്രീകള്ക്ക് പ്രാധാന്യം നല്കാത്ത സംഘടനയാണെന്ന് കുറ്റപ്പെടുത്തിയ രാഹുല് എത്ര സ്ത്രീകള് നിക്കറിട്ട് ശാഖയില് പോകുന്നുണ്ടെന്നും ചോദിച്ചു.
ആര്എസ്എസ്സില് സ്ത്രീകള്ക്കായി രാഷ്ട്ര സേവികാ സമിതിയെന്ന പ്രത്യേക സംഘടന തന്നെ പ്രവര്ത്തിക്കുമ്പോഴാണ് രാഹുല് അബദ്ധം എഴുന്നള്ളിച്ചത്. കാക്കി നിക്കര് നേരത്തെ ആര്എസ്എസ്സിന്റെ യൂണിഫോമിന്റെ ഭാഗമായിരുന്നു. ഇപ്പോള് നിക്കറിന് പകരം പാന്റ്സാണ് ഉപയോഗിക്കുന്നത്. സമൂഹമാധ്യമങ്ങളില് രാഹുലിനെ പരിഹസിച്ച് ട്രോളുകള് പ്രചരിച്ചു. കോണ്ഗ്രസ്സിന്റെ അധ്യക്ഷനായി തെരഞ്ഞെടുക്കാനിരിക്കുന്ന രാഹുലിന് ആര്എസ്എസ്സിനെക്കുറിച്ച് അറിയില്ലേയെന്നാണ് ചോദ്യമുയരുന്നത്. ആര്എസ്എസ്സും ബിജെപിയും രാഹുലിനെതിരെ രംഗത്തെത്തി.
ആര്എസ്എസ്സില് പ്രവര്ത്തിക്കുന്ന സ്ത്രീകളെ അപമാനിക്കുന്ന പ്രസ്താവനയാണ് രാഹുല് നടത്തിയതെന്ന് കേന്ദ്രമന്ത്രി സ്മൃതി ഇറാനി പറഞ്ഞു. സ്ത്രീകള് നിക്കര് ധരിക്കുന്നതാണ് ശാക്തീകരണമെന്നാണോ രാഹുല് മനസിലാക്കിയിരിക്കുന്നത്. പ്രസ്താവനയെ അപലപിക്കുന്നു- അവര് വ്യക്തമാക്കി. സ്ത്രീശാക്തീകരണത്തിനായി രാഹുലിന് ഒന്നും ചെയ്യാനാകില്ലെന്ന് പ്രസ്താവന വ്യക്തമാക്കുന്നതായി ബിജെപി നേതാവ് നുപൂര് ശര്മ്മയും പ്രതികരിച്ചു.
രാഹുല് മാപ്പ് പറയണം: ആര്എസ്എസ്
പരാമര്ശത്തില് രാഹുല് മാപ്പ് പറയണമെന്ന് ആര്എസ്എസ് ആവശ്യപ്പെട്ടു. ആര്എസ്എസ്സിന്റെ പ്രവര്ത്തനം എന്താണെന്ന് രാഹുലിന് അറിയില്ല. ആദ്യം അദ്ദേഹം അത് പഠിക്കട്ടെ. വനിതകള്ക്കായി രാഷ്ട്ര സേവികാ സമിതി നിലവിലുണ്ട്. ആര്എസ്എസ്സിന്റെ പ്രവര്ത്തനങ്ങളില് സ്ത്രീകള് പങ്കാളികളാണ്. അടിസ്ഥാനമില്ലാത്ത പരാമര്ശങ്ങള് നടത്തുന്നത് രാഹുല് ഒഴിവാക്കണം- ആര്എസ്എസ് ചൂണ്ടിക്കാട്ടി. 81 വര്ഷമായി രാഷ്ട്രസേവികാ സമിതി പ്രവര്ത്തിക്കുകയാണെന്ന് പ്രമുഖ് സഞ്ചാലിക ശാന്താക്ക പ്രതികരിച്ചു. ആര്എസ്എസ്സും രാഷ്ട്രസേവികാ സമിതിയും ഒരേ ലക്ഷ്യത്തിനായി പ്രവര്ത്തിക്കുന്ന സമാന്തര സംഘടനകളാണ്. അഖില ഭാരതീയ പ്രതിനിധി സഭയുള്പ്പെടെയുള്ള പ്രധാന യോഗങ്ങളിലെല്ലാം സേവികാ സമിതി പങ്കെടുക്കുന്നുണ്ട്. ഇത് മനസിലാക്കി വേണം രാഹുല് പ്രസംഗിക്കാന്, അവര് വ്യക്തമാക്കി.
