പാലക്കാട്: ഓള് ഇന്ത്യാ മോട്ടോര് ട്രാന്സ്പോര്ട്ട് കോണ്ഗ്രസ് അഖിലേന്ത്യാ തലത്തില് ആഹ്വാനം ചെയ്തിട്ടുളള മോട്ടോര് വാഹന പണിമുടക്കില്, നിര്മ്മാണ മേഖല ഉള്പ്പെടെയുളള, കേരളത്തിലെ ചരക്ക് വാഹനങ്ങള് പങ്കെടുക്കേണ്ടതില്ലെന്ന് സ്റ്റേറ്റ് ലോറി ഓണേഴ്സ് ഫെഡറേഷന് കേരളയുടെ സംസ്ഥാന സെക്രട്ടറിയേറ്റ് യോഗം തീരുമാനിച്ചു.
സംയുക്ത തൊഴിലാളി സംഘടനകളും മോട്ടോര് വാഹന ഉടമകളും ഒന്നിച്ച് അണിനിരന്നുകൊണ്ട് രാജ്യവ്യാപകപ്രക്ഷോഭം ആരംഭിക്കുവാന് ദിവസങ്ങള് മാത്രം ബാക്കിയിരിക്കെ ഒറ്റപ്പെട്ട രീതിയിലുളള വാഹന പണിമുടക്കിന് എഐഎംടിസി ധൃതി പിടിച്ച് ആഹ്വാനം ചെയ്തത് അനവസരത്തിലാണെന്ന് യോഗം വിലയിരുത്തി.
മോട്ടോര് വാഹന പണിമുടക്ക് ആഹ്വാനത്തിന് സ്റ്റേറ്റ് ലോറി ഓണേഴ്സ് ഫെഡറേഷനെപ്പോലെ സംസ്ഥാനത്തെ തൊഴിലാളി സംഘടനകളും പിന്തുണ നല്കാത്ത സാഹചര്യത്തില് ഗുഡ്ഷെഡ്, എഫ് സി ഐ, വ്യവസായ മേഖലകള് തുടങ്ങി സംസ്ഥാനത്തെ മുഴുവന് ചരക്ക് ഗതാഗത മേഖലയും സാധാരണപോലെ പ്രവര്ത്തിക്കുമെന്ന് യോഗം പത്രക്കുറിപ്പില് അറിയിച്ചു. സ്റ്റേറ്റ് ലോറി ഓണേഴ്സ് ഫെഡറേഷന് സംസ്ഥാന പ്രസിഡണ്ട് അഡ്വ. പി.കെ.ജോണ് അധ്യക്ഷത വഹിച്ചു.
