കൊച്ചി: അണ്ടര് 17 ലോകകപ്പിന്റെ ചരിത്രത്തില് മൂന്ന് തവണ ഫൈനലില് കളിച്ചിട്ടും കൈവിട്ട കിരീടം ഇത്തവണ നേടുമെന്ന് സ്പാനിഷ് കോച്ച് സാന്റിയാഗോ ഡെനിയ. 1991, 2003, 2007 വര്ഷങ്ങളിലാണ് ഫൈനലില് എത്തിയത്. 1997ലും 2009ലും മൂന്നാം സ്ഥാനക്കാരായി.
കളിക്കാര് തികഞ്ഞ ആത്മവിശ്വാസത്തിലാണ്. ഇത്തവണ അവര്ക്ക് ലോകകപ്പ് നേടിയേ തീരൂ, മഹാരാജാസ് കോളേജ് ഗ്രൗണ്ടിലെ പരിശീലനത്തിനുശേഷം ഡെനിയ മാധ്യമങ്ങളോട് പറഞ്ഞു.
നിലവില് ടീം നടത്തുന്ന പ്രകടനത്തില് കോച്ച് പൂര്ണ്ണ സംതൃപ്തി രേഖപ്പെടുത്തി. ഈ വര്ഷം മെയില് നടന്ന അണ്ടര് 17 യൂറോ ചാമ്പ്യന്ഷിപ്പില് കിരീടം നേടിയത് ആവര്ത്തിച്ച് ലോകകിരീടവും കൊത്തിപ്പറക്കുകയാണ് ടീമിന്റെ ലക്ഷ്യം. എന്നാല് അന്ന് ടീമിലുണ്ടായിരുന്ന സാന്ദ്രോ ഒറിയാനോ പരിക്കുകാരണം ലോകകപ്പിനെത്തിയിട്ടില്ല. മറ്റുള്ളവരൊക്കെ മികച്ച ഫോമിലാണ്. എങ്കിലും ചില മേഖലകളില് മെച്ചപ്പെടാനുണ്ട്. പ്രത്യേകിച്ചും പ്രതിരോധത്തില്. വരുംദിവസങ്ങളില് ഈ പോരായ്മകള് പരിഹരിക്കുകയും തന്ത്രങ്ങളില് വേണ്ട സമയത്ത് മാറ്റം വരുത്തുകയും ചെയ്യും, ഡെനിയ കൂട്ടിച്ചേര്ത്തു.
ആബേല് റൂയിസാണ് ടീമിലെ സൂപ്പര് താരം. എന്നാല് റൂയിസിനൊപ്പം നില്ക്കുന്ന മറ്റ് നിരവധി താരങ്ങളും ടീമിലുണ്ട്. അതിനാല് റൂയിസിനെ മാത്രം കേന്ദ്രീകരിച്ചായിരിക്കില്ല ടീമിന്റെ കളി തന്ത്രം. ടീമില്ലാതെ കളിക്കാരനില്ലെന്ന് റൂയിസ് അറിയാം. എല്ലാവരും ജയത്തിനുവേണ്ടിയാണ് കളിക്കുന്നത്. ടീമിന് ആവശ്യം വ്യക്തിപരമായ മികവുകളല്ല, മറിച്ച് ഒത്തൊരുമിച്ചുള്ള പ്രകടമാണ്, സാന്റി പറഞ്ഞു. ബാഴ്സലോണയെക്കുറിച്ചുള്ള ചോദ്യങ്ങള്ക്ക് സാന്റി മറുപടി നല്കിയില്ല.
2011 മുതല് സ്പാനിഷ് ടീമിന്റെ കോച്ചായ സാന്റി മുന്പ് അത്ലറ്റികോ മാഡ്രിഡിന്റെ സെന്റര് ബാക്കായിരുന്നു. അത്ലറ്റികോയ്ക്ക് വേണ്ടി 225 മത്സരങ്ങളില് ഇറങ്ങി. സ്പെയ്ന് അണ്ടര് 18, 21, 23 ടീമുകള്ക്കും കളിച്ചു. സീനിയര് ടീമിനായി രണ്ട് മത്സരങ്ങളില് ഇറങ്ങി. 1996ലെ ഒളിമ്പിക്സിലാണ് കളിച്ചത്. 2009ല് അത്ലറ്റികോയുടെ സഹപരിശീലകനും അതേവര്ഷം മുഖ്യ പരിശീലകനുമായി.
