തൊടുപുഴ: ഹോട്ടലുകളുടെ നികുതി വെട്ടിപ്പിന് ഉദ്യോഗസ്ഥരുടെ സഹായം ലഭിക്കുന്നതായി ആരോപണം. 75 ലക്ഷം രൂപയ്ക്ക് മുകളില് വാര്ഷിക വിറ്റുവരവുള്ള എ.സി ഹോട്ടലുകള്ക്ക് 18 ശതമാനം ജിഎസ്ടി ഏര്പ്പെടുത്തിയിട്ടുണ്ട്. 75 ലക്ഷത്തിന് താഴെ വിറ്റുവരവുള്ള ഹോട്ടലുകള് കോമ്പൗണ്ട് ചെയ്താല് അഞ്ച് ശതമാനം നികുതിഅടച്ചാല് മതി.
ഈ ഇളവ് ലഭിക്കാനാണ് 75 ലക്ഷത്തില് കുറവാണ് വിറ്റുവരെന്ന് കാണിച്ച് കേന്ദ്ര-സംസ്ഥാന സര്ക്കാരുകളെ പറ്റിക്കാന് പ്രമുഖ ഉദ്യോഗസ്ഥര് ഹോട്ടലുകള്ക്ക് അനുകൂലമായ നിലപാട് സ്വീകരിക്കുന്നത്. നികുതി വകുപ്പിലുള്ള ജില്ലയിലെ പ്രധാന ഉദ്യോഗസ്ഥന് പാലാ റോഡില് പ്രവര്ത്തിക്കുന്ന ഒരു ഹോട്ടലിന് വേണ്ടി രംഗത്തുണ്ട്. പരിശോധനയില് ഈ റിസോര്ട്ടിന്റെ വാര്ഷിക വരുമാനം 75 ലക്ഷത്തിലധികമാണെന്ന് വ്യക്തമാണ്.
എന്നാല് വിവാദ ഉദ്യോഗസ്ഥന് സൗജന്യ താമസവും ഭക്ഷണവും ഒരുക്കുന്നതിന്റെ പേരില് 18 ശതമാനം നികുതിയില് നിന്നും ഈ റിസോര്ട്ടിനെ ഒഴിവാക്കാന് നീക്കം നടക്കുകയാണ്. മേലുദ്യോഗസ്ഥന്റെ നിര്ദ്ദേശം അനുസരിക്കാന് മാര്ഗമില്ലാതെ ഉദ്യോഗസ്ഥര് വീര്പ്പുമുട്ടുന്നു. കഴിഞ്ഞ ദിവസങ്ങളില് ജില്ലയിലെ ഹോട്ടലുകളില് നടത്തിയ പരിശോധനയുടെ ഫലം പുറത്ത് വന്നാല് ഹോട്ടലുകളിലെ നികുതി തട്ടിപ്പ് വെളിവാകുമെന്നുറപ്പാണ്.ഹോട്ടലുകളും ജിഎസ്ടി രജിസ്ട്രേഷനെടുത്തിട്ടില്ലെന്ന് വ്യക്തമായി. രജിസ്ട്രേഷനെടുക്കാത്ത ചില റിസോര്ട്ടുടമകള് ജിഎസ്ടി എന്ന് ബില്ലില് പ്രിന്റ് ചെയ്ത് ഉപഭോക്താക്കളെ കൊള്ളടയിക്കുന്നതായും വ്യക്തമാണ്.
മൂന്നാര് മേഖലയില് വ്യാപകമായി റിസോര്ട്ടുകളുണ്ട്. മിക്ക റിസോര്ട്ടുകളും ജിഎസ്ടി രജിസ്ട്രേഷനെടുത്തിട്ടില്ല. ഇവരെ നികുതിയടപ്പിക്കാന് ഒരു നടപടികളും ഉദ്യോഗസ്ഥരുടെ ഭാഗത്ത് നിന്ന് ഉണ്ടാകുന്നില്ല.
ജിഎസ്ടിയില് നിന്നും രക്ഷപെടാനുള്ള പഴുതൊരുക്കി ഹോട്ടലുടമകളില് നിന്നും പാരിതോഷികം പറ്റാനാണ് ഒരു വിഭാഗം ഉദ്യോഗസ്ഥരുടെ നീക്കം. സര്ക്കാരിന് നഷ്ടമുണ്ടാക്കുന്ന ഉദ്യോഗസ്ഥരുടെ വിവരങ്ങള് തെളിവ് സഹിതം വിജിലന്സ് വിഭാഗത്തിന് കൈമാറാനൊരുങ്ങുകയാണ് നികുതി കൃത്യമായി അടയ്ക്കുന്ന ഹോട്ടലുടമകള്.
