ശാസ്ത്രനാമം : അരിഷ്‌ടോലോക്യ ബ്രാക്ക്റ്റിയേറ്റ
സംസ്‌കൃതം– ധൂമ്രപത്ര, കീടമാരി. തമിഴ്: ആടുതൊടാപാലൈ.
കാണപ്പെടുന്ന സ്ഥലങ്ങള്‍: മഴ കുറഞ്ഞ വരണ്ട സ്ഥലങ്ങളില്‍ 500 മീറ്ററിനും ആയിരം മീറ്ററിനും ഇടയില്‍ ആള്‍റ്റിറ്റിയൂഡ് ഉള്ള തമിഴ്‌നാട്, കര്‍ണ്ണാടക, ആന്ധ്രാപ്രദേശ് എന്നിവിടങ്ങളില്‍ കാണാം. ഇതൊരു വാര്‍ഷികച്ചെടിയാണ്.
പ്രത്യുല്‍പാദനം: വിത്തുകളില്‍ നിന്നും പ്രത്യുല്‍പാദനം നടത്താം. തമിഴ്‌നാട്ടില്‍ പഴനിമലയ്‌ക്കുതാഴെ കര്‍ശനാട് എന്ന് സ്ഥലത്തും നാഗര്‍കോവില്‍ നിന്ന് 40 കിലോമീറ്റര്‍ ദൂരത്തുള്ള മലഞ്ചെരിവിലും ഈ ചെടി കണ്ടിട്ടുണ്ട്. മധുരയില്‍ ഞായറാഴ്ച ചന്ത പച്ചില മാര്‍ക്കറ്റില്‍ ഇത് വില്‍പനയ്‌ക്ക് വയ്‌ക്കാറുണ്ട്.
ഔഷധത്തിന് ഉപയോഗിക്കുന്ന ഭാഗങ്ങള്‍: ചെടി മുഴുവനായും, വിത്തുകളില്‍ നിന്ന് എണ്ണയും എടുക്കാറുണ്ട്.
ഔഷധ പ്രയോഗങ്ങള്‍: രക്തത്തില്‍ പഞ്ചസാര അളവ് കൂടിയാല്‍ ആടുതീണ്ടാപ്പാല ഇടിച്ചുപിഴിഞ്ഞ ചാറ് 25 മില്ലി, പച്ചമഞ്ഞള്‍ ഇടിച്ചുപിഴിഞ്ഞ ചാറ് 25 മില്ലി, തേന്‍ രണ്ട് മില്ലി ഇപ്രകാരം ദിവസം രണ്ടുനേരം വീതം സേവിച്ചാല്‍ രക്തത്തിലെ പഞ്ചസാരയുടെ അളവ് ഗണ്യമായി കുറയ്‌ക്കാം.
(2) ചെടി സമൂലം ഉണക്കിപ്പൊടിച്ച് ആ പൊടി ത്വക് രോഗം ഉള്ളിടത്ത് തേച്ചാല്‍ ത്വക് രോഗം ശമിക്കും.
(3) ഞാവല്‍ കുരുവും ആടുതീണ്ടാപ്പാലയും സമതൂക്കം എടുത്ത് ആടുതീണ്ടാപ്പാല ഇടിച്ചുപിഴിഞ്ഞ ചാറില്‍ കാപ്പിക്കുരു അളവില്‍ ഗുളിക അരച്ച് നിഴലില്‍ ഉണക്കി ഓരോ ഗുളിക വീതം നെല്ലിക്കാ നീരില്‍ ചാലിച്ച് കഴിച്ചാല്‍ രക്തത്തിലെ പഞ്ചസാര അളവ് കുറയ്‌ക്കാനും പ്രമേഹം മൂലം ഉണ്ടാകുന്ന ചൊറിച്ചിലും സന്ധിവേദനയും കുറയ്‌ക്കുവാനും സഹായിക്കുന്നു. നിഴലില്‍ ഉണക്കുക എന്നാല്‍ പാത്രത്തില്‍ ഗുളിക ഉരുട്ടി വച്ച്, പാത്രം തുണികൊണ്ട് മൂടി വെയിലില്‍ ഉണക്കുക.
(4) ആടുതീണ്ടാപ്പാല മുടികൊഴിച്ചിലിനും ത്വക് രോഗങ്ങള്‍ക്കും ഉണ്ടാക്കുന്ന തൈലങ്ങളില്‍ ചേര്‍ക്കാറുണ്ട്.
5 ശിവനാര്‍വേമ്പ് പൊടിച്ചതും കാര്‍കോകിലരിയും സമതൂക്കം എടുത്ത് ആടുതീണ്ടാപ്പാല ചാറില്‍ അരച്ച് കടല അളവില്‍ ഗുളിക ഉരുട്ടി നിഴലില്‍ ഉണക്കി ഒന്ന് വീതം തേനില്‍ അരച്ച് മൂന്ന് മാസം സേവിച്ചാല്‍ എല്ലാ ത്വക് രോഗങ്ങളും മാറിക്കിട്ടും. ഇങ്ങനെ ഉപയോഗിക്കുമ്പോള്‍ തണുത്തവെള്ളം ഒരുകാര്യത്തിനും ഉപയോഗിക്കരുത്. ഈ പഥ്യം തെറ്റിച്ചാല്‍ ശരീരം മുഴുവന്‍ നീരുവച്ച് മരണത്തിന് വരെ കാരണമാകാം. ഈ ഗുളിക സേവിക്കുമ്പോള്‍ ഏതെങ്കിലും കാരണത്താല്‍ ശരീരത്തില്‍ നീര് വന്നതായി കണ്ടാല്‍ പച്ചമഞ്ഞള്‍ ചാറും കറ്റാര്‍വാഴപോള ചാറും 20-20 മില്ലി വീതം രണ്ട് മില്ലി തേനും ചേര്‍ത്ത് സേവിക്കണം. ശിവനാര്‍ വേമ്പ് ചേര്‍ത്തുള്ള ഔഷധം ഉപയോഗിക്കുന്നത് വളരെ ശ്രദ്ധയോടും ഒരു ചികിത്സകന്റെ നേരിട്ടുള്ള നിയന്ത്രണത്തിലും ആയിരിക്കണം എന്ന് പ്രത്യേകം ഓര്‍മ്മിപ്പിക്കുന്നു.
