രാജ്യത്തെ ആദ്യ അപ്പര് ആം ഡബിള് ട്രാന്സ്പ്ലാന്റേഷന് ശസ്ത്രക്രിയയ്ക്ക് വിധേയയായ ശ്രേയ സിദ്ധനഗൗഡയും മാതാപിതാക്കളും ഡോക്ടര്മാര്ക്കൊപ്പം
കൊച്ചി: രാജ്യത്തെ ആദ്യ അപ്പര് ആം ഡബിള് ട്രാന്സ്പ്ലാന്റേഷന് ആമൃത ഇന്സ്റ്റിറ്റ്യൂട്ട് ഓഫ് മെഡിക്കല് സയന്സസില് വിജയകരമാക്കി പൂര്ത്തിയാക്കി. റോഡപകടത്തില് ഇരുകൈകളും നഷ്ടപ്പെട്ട മണിപ്പാല് ഇന്സ്റ്റിറ്റ്യൂട്ട് ഓഫ് ടെക്നോളജിയില് കെമിക്കല് എഞ്ചിനീയറിങ് വിദ്യാര്ത്ഥിനിയായ ശ്രേയ സിദ്ധനഗൗഡക്കാണ് ശസ്ത്രക്രിയയിലൂടെ കൈകള് വെച്ചുപിടിപ്പിച്ചത്. വാഹനാപകടത്തില് മസ്തിഷ്ക മരണം സംഭവിച്ച എറണാകുളം രാജഗിരി കോളജിലെ ബികോം അവസാന വര്ഷ വിദ്യാര്ത്ഥിയായിരുന്ന സച്ചിന്റെ (20) കൈകളാണ് ഇനി പത്തൊമ്പതുകാരിയായ ശ്രേയയുടെ ശരീരത്തില് തുടിക്കുക.
സപ്തംബറില് പൂനെയില് നിന്നും മംഗളൂരുവിലെ കോളേജിലേക്ക് വരുംവഴി ശ്രേയ സഞ്ചരിച്ചിരുന്ന ബസ് മറിയുകയും ഇരു കൈകളും ഞെരിയുകയും ചെയ്തു. ആശുപത്രിയില് പ്രവേശിപ്പിച്ച ശ്രേയയുടെകൈകളും കൈമുട്ടില് വച്ച് മുറിച്ചു മാറ്റി.ഇരുകൈകളും നഷ്ടപ്പെട്ട തനിക്ക് സ്വപ്നങ്ങള് ഇല്ലാതായി. എന്നാല് മാതാപിതാക്കളുമാണ് ധൈര്യവും പിന്തുണയും നല്കി. അമൃതയില് ഇത്തരത്തിലുള്ള ശസ്ത്രക്രിയകള് മുമ്പ് നടന്നിട്ടുള്ളത് ഏറെ പ്രതീക്ഷയേകി. അന്ന് മുതല് പ്രതീക്ഷയോടെ കാത്തിരിക്കാനുള്ള കരുത്ത് തനിക്ക് ലഭിച്ചുവെന്ന് ശ്രേയ പറഞ്ഞു.
പ്ലാസ്റ്റിക് ആന്ഡ് റീകണ്സ്ട്രക്ട്ടീവ് സര്ജറി വിഭാഗം മേധാവി ഡോ. സുബ്രഹ്മണ്യ അയ്യരുടെ നേതൃത്വത്തില് 20 സര്ജന്മാരും 16 അംഗ അനസ്തെറ്റിക് സംഘവും 13 മണിക്കൂര് എടുത്താണ് ശസ്ത്രക്രിയ പൂര്ത്തിയാക്കിയത്. കൈത്തണ്ടയ്ക്കോ കണങ്കൈയ്ക്കോ മുകളില് കൈകള് മാറ്റി വെയ്ക്കുന്നതിനേക്കാള് കടുത്ത വെല്ലുവിളിയാണ് മുഴങ്കൈക്കും മണിബന്ധത്തിനും ഇടയിലുള്ള ഭാഗത്ത് കൈകള് മാറ്റി വെയ്ക്കുന്നതെന്ന് ഡോ. സുബ്രഹ്മണ്യ അയ്യര് പറഞ്ഞു. ശ്രേയയുടെ മുഴങ്കൈക്കും മണിബന്ധത്തിനും ഇടയിലുള്ള ഭാഗത്തിന്റെ മധ്യഭാഗത്തായിരുന്നു ഇരു കൈകളും ശസ്ത്രക്രിയയിലൂടെ പുനഃസ്ഥാപിച്ചതെന്നും അദ്ദേഹം പറഞ്ഞു.
ശസ്ത്രക്രിയയോട് ശ്രേയയുടെ ശരീരം നന്നായി പ്രതികരിച്ചു. കൈകള്ക്ക് ചലനശേഷി ലഭിച്ചു തുടങ്ങി. ഒരു മാസം ഐസിയുവില് കഴിഞ്ഞതിനുശേഷം ഇപ്പോള് ഇന്റന്സീവ് ഫിസിയോതെറാപ്പിയും റീഹാബിലിറ്റേഷന് ചികിത്സയും ചെയ്യുകയാണ്. ഒന്നര വര്ഷത്തിനുള്ളില് ശ്രേയയ്ക്ക് കൈകളുടെ 85 ശതമാനം ചലനശേഷിയും തിരികെ ലഭിക്കുമെന്നും ഡോ. മോഹിത് ശര്മയും ഡോ. രവിശങ്കരനും പറഞ്ഞു. പൂനെ ടാറ്റ മോട്ടോഴ്സിലെ സീനിയര് മാനേജര് ഫക്കിര്ഗൗഡ സിദ്ധനഗൗഡരുടെയും സുമ നാഗിഹള്ളിയുടെയും ഏകമകളാണ് ശ്രേയ.
