തളിപ്പറമ്പ്: കീഴാറ്റൂരില് പാടം നികത്തി ദേശീയപാതയുടെ ബൈപാസ് റോഡ് നിര്മ്മിക്കുന്നതിനെതിരെ നാട്ടുകാര് നടത്തുന്ന സമരത്തിന് പിന്തുണയുമായി പാര്ട്ടി സംസ്ഥാന അധ്യക്ഷന് കുമ്മനം രാജശേഖരന് സമര പന്തലില് എത്തി.
വയല് നികത്തലിനെ അനുകൂലിക്കുന്ന സിപിഎം നേതൃത്വത്തെ വെല്ലുവിളിച്ചു കൊണ്ടാണ് പാര്ട്ടി ഗ്രാമമായ കീഴാറ്റൂരില് സിപിഎം പാര്ട്ടി അംഗങ്ങള് ഉള്പ്പെടെ നാട്ടുകാര് സമരം നടത്തുന്നത്. വയല് നികത്തി ദേശീയപാത ബൈപ്പാസ് നിര്മിക്കുന്നതിനെതിരെ ‘വയല്ക്കിളികള്’ എന്ന പേരില് കൂട്ടായ്മ രൂപീകരിച്ചാണ് കീഴാറ്റൂരില് നാട്ടുകാര് സമരം നടത്തുന്നത്.
ജീവിക്കാനും, മണ്ണും വയലും ജലവും സംരക്ഷിക്കാനും നടത്തുന്ന സമരത്തിനു പൂര്ണ്ണ പിന്തുണ ബിജെപി വാഗ്ദാനം ചെയ്യുന്നതായും സമര പന്തലിലെത്തിയ കുമ്മനം പറഞ്ഞു. ആവശ്യമായ യാതൊരു പഠനങ്ങളും നടത്താതെയാണു കീഴാറ്റൂര് വയലിലൂടെ ദേശീയപാത ബൈപാസ് നിര്മിക്കാനുള്ള സ്ഥലം ഏറ്റെടുക്കാന് സംസ്ഥാന സര്ക്കാര് തീരുമാനിച്ചത്.
ഇക്കാര്യം ദേശീയപാത അതോറിറ്റിയുടെയും കേന്ദ്ര മന്ത്രാലയത്തിന്റെയും ശ്രദ്ധയില്പ്പെടുത്തും. ഇവിടെ നടക്കുന്നതു ജനങ്ങളുടെ അതിജീവനത്തിനു വേണ്ടിയുള്ള സമരമാണ്. ഇതിനു ബിജെപി എല്ലാവിധ പിന്തുണയും നല്കുമെന്നും കുമ്മനം പറഞ്ഞു.
ലോഡുകണക്കിനു മണ്ണിട്ടു തണ്ണീര്ത്തടങ്ങള് നികത്തിയാല് ജനങ്ങളുടെ കുടിവെള്ളം മുട്ടും. ഇതു ശാസ്ത്രമാണ്. ഇതില് രാഷ്ട്രീയമില്ല. ഒരു ജനതയെ വലിയൊരു ദുരന്തത്തിലേക്കു വലിച്ചിഴച്ച് എന്തു വികസനമാണ് ഇവിടെ നടപ്പാക്കാന് പോകുന്നത്. ഈ വയല് പ്രദേശം മണ്ണിട്ടു നികത്താന് തീരുമാനിക്കുന്നതിനു മുന്പ് ആവശ്യമായ പാരിസ്ഥിതിക പഠനങ്ങള് നടത്താന് സംസ്ഥാന സര്ക്കാര് തയാറാകണമെന്നും കുമ്മനം പറഞ്ഞു.
തണ്ണീര്ത്തട സംരക്ഷണ നിയമങ്ങള് ഉള്പ്പെടെയുള്ള എല്ലാ നിയമങ്ങളും കാറ്റില് പറത്തിയാണു സംസ്ഥാന സര്ക്കാര് ഭൂമി ഏറ്റെടുക്കാന് തീരുമാനിച്ചത്. അതുകൊണ്ടുതന്നെ ഇതു വേണ്ട എന്നു തീരുമാനിച്ചാല് ബദല് മാര്ഗ്ഗത്തെക്കുറിച്ച് ആലോചിക്കാം.
നിലവിലുള്ള ദേശീയ പാത വീതി കൂട്ടണമെന്ന ശാസ്ത്ര സാഹിത്യ പരിഷത്തിന്റെ നിര്ദ്ദേശം സ്വീകാര്യമാണെന്നും കുമ്മനം രാജശേഖരന് പറഞ്ഞു. പാര്ട്ടി ദേശീയ നിര്വാഹക സമിതി അംഗം പി.കെ. കൃഷ്ണദാസ്, ജില്ലാ അധ്യക്ഷന് സത്യപ്രകാശ്, എം.ടി. രമേശ് തുടങ്ങിയവരും അദ്ദേഹത്തോടൊപ്പമുണ്ടായിരുന്നു.
സ്ഥലമെടുപ്പിനു നടപടി തുടങ്ങിയതിനെ തുടര്ന്ന് കഴിഞ്ഞ 10 നാണ് സിപിഎം മുന് ലോക്കല് സെക്രട്ടറി സുരേഷ് കീഴാറ്റൂരിന്റെ നേതൃത്വത്തില് അനിശ്ചിതകാല നിരാഹാരം തുടങ്ങിയത്. അദ്ദേഹത്തിന്റെ ആരോഗ്യനില മോശമായതിനെ തുടര്ന്നു നമ്പ്രാടത്ത് ജാനകിയെന്ന അറുപത്തിയെട്ടുകാരിയാണ് ഇപ്പോള് നിരാഹാരമനുഷ്ഠിക്കുന്നത്.
പാര്ട്ടി വിരുദ്ധമായ സമരം നിര്ത്തണമെന്നു കഴിഞ്ഞ ദിവസം കീഴാറ്റൂരില് പൊതുയോഗത്തില് ജില്ലാ സെക്രട്ടറി പി.ജയരാജന് ആവശ്യപ്പെട്ടിരുന്നു. എന്നാല് സമരക്കാര് പിന്വാങ്ങാന് തയ്യാറായില്ല.
