തിരുവനന്തപുരം: കേരള നിയമസഭയുടെ വജ്രജൂബിലി ആഘോഷങ്ങളുടെ ഭാഗമായി മുന് മുഖ്യമന്ത്രിമാര്, നിയമസഭാ സ്പീക്കര്മാര് എന്നിവരെ ആദരിക്കും. ഇതോടൊപ്പം മുന് അംഗങ്ങളുടെ സുഹൃദ് സംഗമവും നടക്കും.
ഇന്നു രാവിലെ 10.30 ന് സെക്രട്ടേറിയറ്റിലെ പഴയ നിയമസഭാഹാളില് നടക്കുന്ന മുന് സാമാജികരുടെ സുഹൃദ് സംഗമം മുഖ്യമന്ത്രി പിണറായി വിജയന് ഉദ്ഘാടനം ചെയ്യും. സ്പീക്കര് പി. ശ്രീരാമകൃഷ്ണന് അദ്ധ്യക്ഷത വഹിക്കും. ഒന്നാം നിയമസഭയില് അംഗങ്ങളായിരുന്ന കെ.ആര്. ഗൗരിഅമ്മ, ഇ. ചന്ദ്രശേഖരന്നായര് എന്നിവരെ ആദരിക്കും. പ്രതിപക്ഷ നേതാവ് രമേശ് ചെന്നിത്തല, ഡെപ്യൂട്ടി സ്പീക്കര് വി. ശശി, നിയമസഭാ സെക്രട്ടറി വി.കെ. ബാബുപ്രകാശ് എന്നിവര് സംസാരിക്കും.
ഉച്ചയ്ക്ക് രണ്ടിന് നിയമസഭാ മന്ദിരത്തിലെ ശങ്കരനാരായണന് തമ്പി മെമ്പേഴ്സ് ലോഞ്ചില് സംഗീത പരിപാടി നടക്കും. ദേശഭക്തി ഗാനങ്ങളും കവിതകളും കോര്ത്തിണക്കി പ്രൊഫ. കെ. ഓമനക്കുട്ടിയുടെ നേതൃത്വത്തിലാണ് ഗാനാമൃതം അവതരിപ്പിക്കുക. വൈകിട്ട് നാലിന് മുന് മുഖ്യമന്ത്രിമാര്, സ്പീക്കര്മാര് എന്നിവരെ ആദരിക്കുന്ന ചടങ്ങ് മുഖ്യമന്ത്രി പിണറായി വിജയന് ഉദ്ഘാടനം ചെയ്യും. സ്പീക്കര് പി. ശ്രീരാമകൃഷ്ണന് അദ്ധ്യക്ഷത വഹിക്കും. പ്രതിപക്ഷ നേതാവ് രമേശ് ചെന്നിത്തല, ഡെപ്യൂട്ടി സ്പീക്കര് വി. ശശി, നിയമസഭാ സെക്രട്ടറി വി. കെ. ബാബുപ്രകാശ് എന്നിവര് സംസാരിക്കും.
രാത്രി ഏഴിന് സംസ്ഥാന സ്പോര്ട്സ് കൗണ്സിലിന്റെ ആഭിമുഖ്യത്തില് ചീഫ് മിനിസ്റ്റേഴ്സ് ഇലവനും സ്പീക്കേഴ്സ് ഇലവനും തമ്മില് ചന്ദ്രശേഖരന് നായര് സ്റ്റേഡിയത്തില് സൗഹൃദ ഫുട്ബാള് മത്സരം നടത്തും.
