മൂലമറ്റം: പട്ടികജാതി വകുപ്പിന്റെ മൂലമറ്റത്തെ ജില്ലാ ഓഫീസിന് മുമ്പില്‍ നടത്തിയ ഒറ്റയാള്‍ പോരാട്ടം വിജയം കണ്ടു. അഞ്ച് വര്‍ഷമായി ഇരട്ടയാര്‍ പഞ്ചായത്തിലും മുമ്പ് മൂന്ന് വര്‍ഷക്കാലം കോട്ടയത്തെ പാമ്പാടി പഞ്ചായത്തിലും എസ്.സി പ്രമോട്ടറായി പ്രവര്‍ത്തിച്ച ഇരട്ടയാര്‍ കവലയില്‍ വീട്ടില്‍ മാലിനി. പി.ഗോപിനാഥ് നടത്തിയ ഉപവാസ സമരമാണ് വിജയം കണ്ടത്.
40 വയസ്സ് കഴിയുകയും എസ്.സി പ്രമോട്ടറായി എട്ട് വര്‍ഷക്കാലം പ്രവര്‍ത്തിക്കുകയും ചെയ്തവര്‍ക്ക് 10% പരിഗണന നല്കണമെന്ന ഹൈക്കോടതി ഉത്തരവിന് വിരുദ്ധമായി മാലിനിയെ പിരിച്ചു വിട്ട് പുതിയതായി പ്രമോട്ടര്‍മാരെ നിശ്ചയിക്കുവാനായി മൂലമറ്റത്തെ ഓഫീസില്‍ ഇന്റര്‍വ്യൂ നടത്തുവാനുള്ള ശ്രമമാണ് ഉപവാസ സമരത്തിലൂടെ ഇല്ലാതാക്കിയത്. ബി.എം.എസ് മേഖലാ പ്രസിഡന്റ് എം.ജി ഗോപാലകൃഷ്ണന്റെ അധ്യക്ഷതയില്‍ നടന്ന ഉപവാസ സമരം ബി.ജെ.പി സംസ്ഥാന കമ്മിറ്റി അംഗം പി.എ.വേലുക്കുട്ടന്‍ ഉദ്ഘാടനം ചെയ്തു. ഉപവാസ സമരം നടത്തിയ മാലിനിയെ ഗ്രാമപഞ്ചായത്ത് മെമ്പര്‍ രമ രാജീവ് ഹാരമണിയിച്ചു.
കേരളാ സ്റ്റേറ്റ് എസ്.സി പ്രമോട്ടേഴ്‌സ് എംപ്ലോയീസ് അസോസിയേഷന്‍ സംസ്ഥാന പ്രസിഡന്റ് സന്തോഷ് കവലയ്‌ക്കല്‍ മുഖ്യ പ്രഭാഷണം നടത്തി.
ബിജെപി, ബിഎംഎസ് നേതാക്കളായ എം.ജെ ജോണ്‍സണ്‍, ഡി രാജീവ്, വിജീഷ് വിജയന്‍, എം വി സിജു, ഗ്രാമപഞ്ചായത്ത് മെമ്പര്‍ ബിജി വേലുക്കുട്ടന്‍ എന്നിവര്‍ പ്രസംഗിച്ചുച്ചു.
ബിജെപി,ബിഎംഎസ് നേതാക്കള്‍ ജില്ലാ പട്ടികജാതി വികസന ഓഫീസര്‍ കെ.എച്ച് അബ്ദുള്‍ സത്താറുമായി നടത്തിയ ചര്‍ച്ചയുടെ ഭാഗമായി കോടതി ഉത്തരവ് പാലിക്കുമെന്ന് നല്കിയ ഉറപ്പിന്റെ അടിസ്ഥാനത്തില്‍ എം.ജെ.ജോണ്‍സണ്‍ നല്കിയ നാരങ്ങാനീര് കുടിച്ചാണ് മാലിനി ഉപവാസ സമരം അവസാനിപ്പിച്ചത്.
