ആലപ്പുഴ: കേന്ദ്രസര്ക്കാര് ഭരണപരമായ അന്തസ്സ് പുലര്ത്തുന്നുണ്ടെന്ന് മന്ത്രി ജി. സുധാകരന്. രാഷ്ട്രീയമായ ഭിന്നതകള് ഉണ്ടെങ്കിലും സത്യം പറയാതിരിക്കാനാകില്ല, ഇക്കാര്യം പറഞ്ഞതിന് താന് കേന്ദ്ര സര്ക്കാരിനെ പുകഴ്ത്തിയെന്ന് പ്രചരിപ്പിച്ചാലും കുഴപ്പമില്ല. എല്ലാ കാര്യത്തിലും കേന്ദ്ര സര്ക്കാര് അനുഭാവപൂര്വമായ നിലപാടാണ് സ്വീകരിച്ചിട്ടുള്ളത്.
മന്ത്രി അല്ഫോന്സ് കണ്ണന്താനം പാലമായി പ്രവര്ത്തിക്കാതെ തന്നെയാണ് കേന്ദ്രത്തില് നിന്ന് ആനുകൂല്യങ്ങള് ലഭിച്ചത്. കഴിഞ്ഞ യുഡിഎഫ് സര്ക്കാരിന്റെ കാലത്ത് അഞ്ചു വര്ഷക്കാലയളവില് കേന്ദ്രത്തില് നിന്ന് സിആര് ഫണ്ട് ലഭിച്ചത് 500 കോടിയാണ്. താന് മന്ത്രിയായ ശേഷമുള്ള കാലയളവില് 625 കോടി രൂപ ലഭിച്ചു കഴിഞ്ഞു. ആലപ്പുഴ ബൈപ്പാസ് യാഥാര്ത്ഥ്യമാക്കിയതും മോദി സര്ക്കാരാണ്. ഏനാത്ത് പാലം തകര്ന്നപ്പോള് പ്രതിരോധ മന്ത്രിക്ക് ഒരു ഇ മെയില് മാത്രമാണ് അയച്ചത്. പിറ്റേന്ന് സൈന്യം എത്തി താത്ക്കാലിക പാലം നിര്മ്മിച്ചതും സ്മരണീയമാണെന്നും സുധാകരന് പറഞ്ഞു.
മഴ മാറിയാലുടന് സംസ്ഥാനത്തെ റോഡുകളുടെ അറ്റകുറ്റപണികള് ആരംഭിക്കും. 300 കോടി രൂപയാണ് എല്ലാ നിയോജക മണ്ഡലങ്ങള്ക്കുമായി റോഡ് അറ്റകുറ്റപണികള്ക്ക് അനുവദിച്ചിട്ടുള്ളത്. മഴ തടസ്സം സൃഷ്ടിച്ചില്ലായിരുന്നെങ്കില് റോഡുകളുടെ അറ്റകുറ്റപണികള് ഇതിനകം ചെയ്തു തീര്ക്കുമായിരുന്നെന്നു. റോഡു കയ്യേറ്റമാണ് പ്രധാന വെല്ലുവിളി. നാലുവരിപ്പാതകള് പോലും ഒരു വിഭാഗം കയ്യേറുകയാണ്. ജനങ്ങളുടെ സഞ്ചാര സ്വാതന്ത്യം തടസ്സപ്പെടുത്തുന്ന ഇത്തരം പ്രവണതകളെ രാഷ്ട്രീയ പാര്ട്ടികളും പൊതു സമൂഹവും പ്രോത്സാഹിപ്പിക്കരുതെന്നും അദ്ദേഹം പറഞ്ഞു.
