കണ്ണൂര്: കണ്ണൂര് സര്വ്വകലാശാലയുടെ പശ്ചാത്തല സൗകര്യ വികസനത്തിനായി 240 കോടി രൂപ കിഫ്ബി വഴി ലഭ്യമാക്കുമെന്ന് വിദ്യാഭ്യാസ വകുപ്പ് മന്ത്രി സി.രവീന്ദ്രനാഥ് അറിയിച്ചു. കണ്ണൂര് സര്വ്വകലാശാല വിദ്യാര്ഥി ക്ഷേമ കേന്ദ്രത്തിന് ശിലാസ്ഥാപനം നിര്വഹിച്ച് സംസാരിക്കുകയായിരുന്നു അദ്ദേഹം. ഇതിനു പുറമെ 140 കോടി രൂപ സംസ്ഥാന സര്ക്കാര് പദ്ധതി ഫണ്ടായി സര്വ്വകലാശാലക്ക് നല്കിയിട്ടുണ്ട്. റൂസ ഫണ്ടില് ഇരുപത് കോടിയും ലഭ്യമായിട്ടുണ്ട്. ഇങ്ങനെ ആകെ 400 കോടി രൂപയുടെ വികസന പ്രവര്ത്തനങ്ങള്ക്ക് ഈ അക്കാദമിക് വര്ഷം കണ്ണൂര് സര്വ്വകലാശാലക്ക് സംസ്ഥാന സര്ക്കാര് സാമ്പത്തികാനുമതി നല്കും.
ചടങ്ങില് പ്രൊ.വൈസ് ചാന്സലര് ഡോ.ടി അശോകന് അധ്യഷത വഹിച്ചു. മേയര് ഇ.പി.ലത, കെ.കെ.രാഗേഷ് എംപി, ജില്ലാ പഞ്ചായത്ത് പ്രസിഡണ്ട് കെ.വി.സുമേഷ്, കൗണ്സിലര് അഡ്വ. ലിഷ ദീപക്, വിജയന് അടുക്കാടന്, കെ.പി.പ്രേമന് തുടങ്ങിയവര് സംസാരിച്ചു. രജിസ്ട്രാര് ഡോ.ബാലചന്ദ്രന് കീഴോത്ത് സ്വാഗതം പറഞ്ഞു.
