ലണ്ടന്: യൂറോപ്പ ലീഗ് ഫൂട്ബോള് ചാമ്പ്യന്ഷിപ്പിന്റെ ആദ്യ ഗ്രൂപ്പ് മത്സരത്തില് കരുത്തരായ എസി മിലാന്, ആഴ്സണല്, വിയ്യാറയല്, ഡൈനാമോ കീവ്, സ്പോര്ട്ടിങ് ബ്രാഗ, അറ്റ്ലാന്റ, സ്റ്റീവ ബുക്കാറസ്റ്റ്, മാഴ്സെലെ, നീസ്, ലാസിയോ തുടങ്ങിയ ടീമുകള്ക്കെല്ലാം വിജയത്തുടക്കം.
ഗ്രൂപ്പ് എച്ചില് നടന്ന മത്സരത്തില് ഒരു ഗോളിന് പിന്നിട്ടുനിന്നശേഷം മൂന്നെണ്ണം തിരിച്ചുകൊടുത്താണ് ആഴ്സണല് ജര്മ്മന് ക്ലബ് കൊളോനിനെ തകര്ത്തത്. എമിറേറ്റ്സ് സ്റ്റേഡിയത്തില് നടന്ന മത്സരത്തിന്റെ ഒമ്പതാം മിനിറ്റില് ഗോള് നേടി കൊളോണ് ആഴ്സണലിനെ ഞെട്ടിച്ചു. ആഴ്സണല് ഗോള് കീപ്പര് ഓസ്പിന ക്ലിയര് ചെയ്ത പന്ത് കാലില് കിട്ടിയ ജോണ് കോര്ബോഡാക്ക് പിഴച്ചില്ല. ഗ്രൗണ്ടിന് മധ്യഭാഗത്ത് നിന്നുള്ള ബുള്ളറ്റ് ലോങ് റേഞ്ചര് വലയില് പതിക്കുകയായിരുന്നു.
രണ്ടാം പകുതിയുടെ തുടക്കത്തില് പകരക്കാരനായി ഇറങ്ങിയ കൊലാസിനിക്കിലൂടെ ആഴ്സണല് സമനില പിടിച്ചു. കൊളാസിനിക്കിന്റെ ഇടങ്കാലന് ഷോട്ട് കൊളോണ് ഗോള്കീപ്പര്ക്ക് ഒരു അവസരവും നല്കാതെ വലയിലെത്തി. 67-ാം മിനിറ്റില് അലക്സി സാഞ്ചസ് ബോക്സിന് പുറത്തുനിന്ന് പായിച്ച ഷോട്ടിലൂടെ ആഴ്സണല് ലീഡ് നേടി. രണ്ടു പ്രതിരോധനിരക്കാരെ മറികടന്ന് സാഞ്ചസിന്റെ ഷോട്ട് കൊളോണ് വല കുലുക്കുകയായിരുന്നു. പിന്നീട് 82-ാം മിനിറ്റില് ഹെക്ടര് ബെല്ലറിന് ആഴ്സണലിന്റെ വിജയമുറപ്പിച്ച ഗോള് നേടി. ആഴ്സണലിന്റെ മുന്നേറ്റത്തിനൊടുവില് വാല്കോട്ട് തൊടുത്ത ഷോട്ട് കൊളോണ് ഗോള് കീപ്പര് സേവ് ചെയ്തെങ്കിലും റീബൗണ്ട് വന്ന പന്ത് ബെല്ലറിന് ലക്ഷ്യത്തിലെത്തിക്കുകയായിരുന്നു.
ഗ്രൂപ്പ് ഡിയില് നടന്ന എവേ മത്സരത്തില് എസി മിലാന് വമ്പന് വിജയമാണ് നേടിയത്. ഒന്നിനെതിരെ അഞ്ച് ഗോളുകള്ക്ക് ആസ്ട്രിയ വിയന്നയെ അവര് തകര്ത്തു.
വാലന്റെ സില്വയുടെ ഹാട്രിക്കാണ് മിലാന് വിജയത്തിലെ സവിശേഷത.10, 20, 56 മിനിറ്റുകളിലായിരുന്നു സില്വയുടെ ഹാട്രിക്ക്. 7-ാം മിനിറ്റില് കലനോഗ്ലു, 63-ാം മിനിറ്റില് ഫെര്ണാണ്ടസ് സയേസ് എന്നിവരും മിലാനായി ലക്ഷ്യം കണ്ടു. ആസ്ട്രിയ വിയന്നയുടെ ആശ്വാസഗോള് 47-ാം മിനിറ്റില് ബൊര്കോവിച്ചിലൂടെയായിരുന്നു. മറ്റൊരു കളിയില് എഇകെ ഏഥന്സും വിജയം നേടി.
ഗ്രൂപ്പ് ഇയില് നടന്ന മത്സരത്തില് ഇറ്റാലിയന് ക്ലബ് അറ്റ്ലാന്റ മറുപടിയില്ലാത്ത മൂന്ന് ഗോളുകള്ക്ക് പ്രീമിയര് ലീഗ് ടീം എവര്ട്ടണെ തകര്ത്തു. അറ്റ്ലാന്റക്കായി 27-ാം മിനിറ്റില് മാസിലിയോ, 41-ാം മിനിറ്റില് അലെസ്സാന്ഡ്രോ ഗോമസ്, 44-ാം മിനിറ്റില് ബ്രയാന് ക്രിസ്റ്റന്ന്റെ എന്നിവര് ഗോള് നേടി. മറ്റൊരു മത്സരത്തില് അപോളോന് ലിമസ്സോളും ലിയോണും 1-1ന് സമനില പാലിച്ചു.
ഗ്രൂപ്പ് എയില് നടന്ന മത്സരങ്ങളില് സ്ലാവിയ പ്രാഗ് 1-0ന് മക്കാബി ടെല് അവീവിനെയും വിയ്യാറയല് 3-1ന് എഫ്സി അസ്താനയെയും പരാജയപ്പെടുത്തി. ഗ്രൂപ്പ് ജെയില് അത്ലറ്റിക് ബില്ബാവോയും ഹെര്ത്തയും ഗോള്രഹിത സമനിലയില് പിരിഞ്ഞപ്പോള് ഒസ്റ്റര്സണ്ട്സ് 2-0ന് േസാറിയ ലുഹാന്കിനെ കീഴടക്കി. ഗ്രുപ്പ് കെയിലെ പോരാട്ടങ്ങളില് നീസും ലാസിയോയും ഗ്രൂപ്പ് എല്-ല് റയല് സോസിദാദും സെനിത് സെന്റ് പീറ്റേഴ്സ് ബര്ഗും തകര്പ്പന് വിജയങ്ങള് സ്വന്തമാക്കി. ഗ്രൂപ്പ് ജിയില് സ്റ്റീവ് ബുക്കാറസ്റ്റ് മറുപടിയില്ലാത്ത മൂന്ന് ഗോളുകള്ക്കാണ് വിക്ടോറിയ പ്ലസനെ കീഴടക്കിയത്.
