ലാഹോര്: സ്വന്തം മണ്ണില് കളിക്കാനെത്തിയ ലോക ഇലവനെ പാക്കിസ്ഥാന് തോല്പ്പിച്ചു. മൂന്ന് ട്വന്റി 20 മത്സരങ്ങള്ക്കായി എത്തിയ ലോക ഇലവനെതിരായ ആദ്യ മത്സരത്തില് 20 റണ്സിന്റെ വിജയമാണ് പാക്കിസ്ഥാന് സ്വന്തമാക്കിയത്.
ഇന്ഡിപെന്ഡന്സ് കപ്പ് ട്വന്റി 20 ടൂര്ണമെന്റിലെ ആദ്യ പോരാട്ടത്തില് ആദ്യം ബാറ്റ് ചെയ്ത പാക്കിസ്ഥാന് 20 ഓവറില് അഞ്ച് വിക്കറ്റ് നഷ്ടത്തില് 197 റണ്സെടുത്തു. മറുപടി ബാറ്റിങ്ങിനിറങ്ങിയ ഡുപ്ലെസിസിന്റെ നേതൃത്വത്തിലുള്ള ലോക ഇലവന് 7 വിക്കറ്റ് നഷ്ടപ്പെടുത്തി 177 റണ്സെടുക്കാനേ കഴിഞ്ഞുള്ളൂ.
നേരത്തെ ടോസ് നഷ്ടപ്പെട്ട് ബാറ്റിങ്ങിനയക്കപ്പെട്ട പാക്കിസ്ഥാന് മോശം തുടക്കത്തിനുശേഷമാണ് മികച്ച സ്കോര് പടുത്തുയര്ത്തിയത്. 52 പന്തില് 10 ഫോറും രണ്ട് സിക്സറുമടക്കം 86 റണ്സ് അടിച്ചുകൂട്ടിയ ബാബര് അസമാണ് പാക് നിരയിലെ ടോപ്സ്കോറര്. മുന് ക്യാപ്റ്റന് ഷോയബ് മാലിക് (20 പന്തില് 38), ഓപ്പണര് അഹമദ് ഷെഹ്സാദ് (34 പന്തില് 39) എന്നിവരും ബാബര് അസമിന് പിന്തുണ നല്കി. മാലിക് 20 പന്തില് നാലു ബൗണ്ടറിയും രണ്ടു സിക്സറും പറത്തി. ഇമാദ് വസീം നാലു പന്തില് രണ്ടു സിക്സറടക്കം 15 റണ്സ് നേടി പുറത്താകാതെ നിന്നു. ലോക ഇലവന് വേണ്ടി ലങ്കന് താരം തീസര പെരേര രണ്ട് വിക്കറ്റുകള് വീഴ്ത്തി.
മറുപടി ബാറ്റിങ്ങ് ആരംഭിച്ച ലോക ഇലവന് ഭേദപ്പെട്ട തുടക്കം ലഭിച്ചെങ്കിലും വിജയത്തിലേക്ക് മുന്നേറാന് കഴിഞ്ഞില്ല. കൃത്യമായ ഇടവേളകളില് വിക്കറ്റുകള് വീണതാണ് അവരെ പരാജയത്തിലേക്ക് നയിച്ചത്. ഡുപ്ലെസിസും (29) ഡാരന് സമി (29*)മാണ് ലോക ഇലവനായി തിളങ്ങിയത്. ഹാഷിം ആംല 26ഉം ടിം പെയ്നെ (25) എന്നിവരും തരക്കേടില്ലാതെ ബാറ്റ് ചെയ്തു. രണ്ട് വിക്കറ്റുകള് വീതം വീഴ്ത്തിയ സൊഹൈല് ഖാന്, റുമാന് റെയീസ്, ഷദാബ് ഖാന് എന്നിവര് ബൗളിങ് നിരയില് തിളങ്ങി.
