ചാരുംമൂട്: മാല മോഷണവുമായി ബന്ധപ്പെട്ട് നാട്ടുകാര് പിടികൂടി നൂറനാട് പോലീസിനു കൈമാറിയ പുലിമേല് കൂമ്പുളുമല രജുഭവനത്തില് രജുവിന്റെ മരണം തലയുടെ പിന്നില് ഉണ്ടായ ക്ഷതമാണ് മരണകാരണമെന്ന് പ്രാഥമിക പോസ്റ്റ്മോര്ട്ടം റിപ്പോര്ട്ട്. ഇയാള് പോലീസ് വാഹനത്തില് നിന്നും രക്ഷപ്പെടുവാന് ശ്രമിക്കുന്നതിനിടെയാണ് വീണ് പരിക്കേറ്റത്. രജുവിനെ മര്ദ്ദിച്ചതിന് കണ്ടാലറിയാവുന്ന പത്തോളം പേരെ പ്രതിയാക്കിയും കേസെടുത്തിട്ടുള്ളതായി എസ്ഐ വി. ബിജു അറിയിച്ചു. ആലപ്പുഴ മെഡിക്കല് കോളേജ് ഫൊറന്സിക് വിദഗ്ദ്ധന് ഡോ. സഖറിയായുടെ നേതൃത്വത്തിലായിരുന്നു പോസ്റ്റ്മാര്ട്ടം. തലയുടെ പിന്നില് രണ്ടു മുറിവുകളും കണ്ണിന്റെ ഭാഗത്ത് ഒരു മുറിവുമുണ്ട്. ശരീരത്തില് മുപ്പതോളം ചതവുകളും ചവിട്ടിയ പാടുകളും കാണപ്പെട്ടു. പോലീസ് കസ്റ്റഡിയില് എടുത്ത രജുവുമായി നൂറനാട് പോലീസ് സ്റ്റേഷനിലേക്ക് വരുന്ന വഴി കളീയ്ക്കല് ജങ്ഷനിലാണ് ഇയാള് ജീപ്പില് നിന്നും രക്ഷപ്പെടാന് ശ്രമിച്ചത്. ഇയാളെ നൂറനാട്ടുള്ള സ്വകാര്യ ആശുപത്രിയിലും തുടര്ന്ന് ആലപ്പുഴ മെഡിക്കല് കോളേജിലും പ്രവേശിപ്പിച്ചെങ്കിലും മരിച്ചു.
