കൊച്ചി: ഹിന്ദു ഐക്യവേദി സംസ്ഥാന പ്രസിഡന്റ് കെ.പി. ശശികലയുടെ പ്രസംഗം വളച്ചൊടിച്ച് കോണ്ഗ്രസ്സും സിപിഎമ്മും വിവാദമാക്കി. പറവൂരില് ഹിന്ദു ഐക്യവേദി സംഘടിപ്പിച്ച ഹിന്ദു സ്വാഭിമാന റാലി ഉദ്ഘാടനം ചെയ്ത് ശശികല നടത്തിയ പ്രസംഗമാണ് വിവാദമാക്കിയത്. മാധ്യമ പ്രവര്ത്തകയായ ഗൗരി ലങ്കേഷിന്റെ കൊലപാതകവുമായി ബന്ധപ്പെട്ടതായിരുന്നു പ്രസംഗം. കോണ്ഗ്രസ്സാണ് കൊലപാതകത്തിന് പിന്നിലെന്ന് പ്രസംഗത്തില് ശശികല വ്യക്തമായി പരാമര്ശിച്ചിരുന്നു. എന്നാല്, പ്രസംഗത്തിലെ ചില ഭാഗങ്ങള് മാത്രമെടുത്ത് ഇരുകൂട്ടരും വിമര്ശനവുമായി രംഗത്തുവന്നു.
ശശികലയുടെ പ്രസംഗത്തിന്റെ പ്രസക്ത ഭാഗം ഇങ്ങനെ. ”എതിര്ക്കുന്തോറും വളരുന്നതാണ് ആര്എസ്എസ്. എതിര്ക്കുന്നവരെ കൊല്ലേണ്ട ഗതികേട് ആര്എസ്എസിനില്ല. അങ്ങനെയൊരു കൊലപാതകം കോണ്ഗ്രസിന് ആവശ്യമാണ്. ഇലക്ഷനില് നിലംപറ്റുമെന്ന സ്ഥിതിയില് കോണ്ഗ്രസ്സിന് കൊല ആവശ്യമാണ്. അതുകൊണ്ട് ഇവിടുത്തെ മതേതരവാദികളായ എഴുത്തുകാരോട് പറയാനുള്ളത,് മക്കളേ, ആയുസ്സ് വേണമെങ്കില് മൃത്യുഞ്ജയഹോമം നടത്തിക്കോ” എന്നായിരുന്നു ശശികല പ്രസംഗിച്ചത്. കോണ്ഗ്രസ്സാണ് കൊലയ്ക്ക് പിന്നിലെന്ന് കൃത്യമായി വ്യക്തമാക്കുന്നതായിരുന്നു പ്രസംഗം.
ഇത് വളച്ചൊടിച്ചാണ് സോഷ്യല്മീഡിയയിലുള്പ്പെടെ പ്രചരിപ്പിക്കുന്നത്. വി.ഡി. സതീശന് എംഎല്എയാണ് ഈ പ്രചാരണങ്ങള്ക്ക് ചുക്കാന് പിടിക്കുന്നത്. മതസ്പര്ധയുണ്ടാക്കുന്ന ലഘുലേഖ വിതരണം ചെയ്തവരെ ആര്എസ്എസ് ബിജെപി പ്രവര്ത്തകര് ചേര്ന്ന് പിടികൂടി നേരത്തെ പോലീസിലേല്പ്പിച്ചിരുന്നു. ഇവര്ക്ക് വി.ഡി. സതീശന് പിന്തുണ നല്കിയിരുന്നു. ഇതിനെ ആര്എസ്എസ് എതിര്ത്തിരുന്നു. ഈ വിരോധമാണ് പ്രസംഗം വിവാദമാക്കിയതിന് പിന്നില്.
