വഡൂസ്: ലോകകപ്പ് യോഗ്യതാ മത്സരത്തില് സ്പെയിനിന് തകര്പ്പന് ജയം. മറുപടിയില്ലാത്ത എട്ട് ഗോളുകള്ക്ക് അവര് ലിച്ചന്സ്റ്റൈന്നെ തകര്ത്തു. സ്പെയിനിനായി ആല്വാരോ മൊറാട്ട, ഇയാഗോ ആസ്പാസ് എന്നിവര് രണ്ട് ഗോളുകള് നേടി. സെര്ജിയോ റാമോസ്, ഡേവിഡ് സില്വ, ഇസ്കോ എന്നിവരും ചെമ്പടക്കായി ലക്ഷ്യം കണ്ടപ്പോള് അവസാന ഗോള് ലിച്ചന്സ്റ്റൈന്റെ മാക്സിമിലിയന് ഗോപലിന്റെ സംഭാവനയായിരുന്നു.
കളിയുടെ മൂന്നാം മിനിറ്റിലാണ് സ്പെയിന് ഗോള് മഴക്ക് തുടക്കമിട്ടത്. ഡേവിഡ് സില്വയെടുത്ത് ഫ്രീകിക്ക് ഉജ്ജ്വലമായ ഹെഡ്ഡറിലൂടെ ക്യാപ്റ്റന് സെര്ജിയോ റാമോസ് ലിച്ചന്സ്റ്റൈന് വലയിലെത്തിച്ചു. 15-ാം മിനിറ്റില് രണ്ടാം ഗോള്.
ആന്ദ്രെ ഇനിയേസ്റ്റയുടെ പാസില് നിന്ന് മൊറാട്ട ലക്ഷ്യം കാണുകയായിരുന്നു. തൊട്ടടുത്ത മിനിറ്റില് മൊറാട്ട ഒരുക്കിയ അവസരത്തില് നിന്ന് ഇസ്കോയും നിറയൊഴിച്ചതോടെ സ്പെയിന് 3-0ന് മുന്നില്. 39-ാം മിനിറ്റില് സില്വയും ലക്ഷ്യം കണ്ടപ്പോള് ആദ്യ പകുതിയില് ചെമ്പടക്ക് 4-0ന്റെ ലീഡ്.
പിന്നീട് 51, 63 മിനിറ്റുകളില് ആസ്പാസിന്റെ ഇരട്ട പ്രഹരം. ഇതിനിടെ 54-ാം മിനിറ്റില് മൊറാട്ട തന്റെ രണ്ടാം ഗോളും കണ്ടെത്തി. 89-ാം മിനിറ്റില് മാക്സ്മിലിയന് ഗോപല് സ്വന്തം വലയില് പന്തെത്തിച്ചതോടെ സ്പാനിഷ് ഗോള്മഴക്ക് വിരാമമായി. ജയത്തോടെ 22 പോയിന്റുമായി സ്പെയിന് ഗ്രൂപ്പ് ജിയില് ഒന്നാമത്. ലിച്ചന്സ്റ്റൈന് കളിച്ച എട്ട് കളികളും തോറ്റു.
മറ്റൊരു മത്സരത്തില് ഇറ്റലി കഷ്ടിച്ച് വിജയം നേടി.
ഏകപക്ഷീയമായ ഒരു ഗോളിനാണ് അസൂറികള് ഇസ്രയേലിനെ കീഴടക്കിയത്. സിറോ ഇമോബൈലിന്റെ ഗോളാണ് മുന് ലോക ചാമ്പ്യന്മാരെ രക്ഷപ്പെടുത്തിയത്. കഴിഞ്ഞ മത്സരത്തില് സ്പെയിനിനോട് കനത്ത തോല്വി വഴങ്ങിയ അസൂറികള്ക്ക് ഇസ്രയേലിനെതിരായ ജയം ആശ്വാസമായി.
ജയത്തോടെ 19 പോയിന്റുള്ള ഇറ്റലി ഗ്രൂപ്പില് സ്പെയിനിന് പിറകില് രണ്ടാമതാണ്. ഒക്ടോബര് 6ന് നടക്കുന്ന അടുത്ത മത്സരത്തില് ഇറ്റലിക്ക് മാസിഡോണിയയും സ്പെയിനിന് അല്ബേനിയയുമാണ് എതിരാളികള്. മാസിഡോണിയയും അല്ബേനിയയും തമ്മില് നടന്ന മറ്റൊരു മത്സരം 1-1ന് സമനിലയില് കലാശിച്ചു.
ഗ്രൂപ്പ് ഡിയില് നടന്ന മത്സരത്തില് സെര്ബിയ, വെയ്ല്സ് ടീമുകള് വിജയിച്ചപ്പോള് ആസ്ട്രിയ സമനിലകൊണ്ട് തൃപ്തരായി. സെര്ബിയ ഏകപക്ഷീയമായ ഒരു ഗോളിന് അയര്ലന്ഡിനെ പരാജയപ്പെടുത്തി. ഗോള്രഹിതമായ ആദ്യപകുതിക്കുശേഷം കളിയുടെ 55-ാംമിനിറ്റില് അലക്സാണ്ടര് കൊളറോവാണ് സെര്ബിയയുടെ വിജയഗോള് നേടിയത്. വിജയത്തോടെ സെര്ബിയ 8 കളികളില് നിന്ന് 18 പോയിന്റുമായി ഒന്നാം സ്ഥാനത്ത് തുടരുന്നു.
വെയ്ല്സ് മറുപടിയില്ലാത്ത രണ്ട് ഗോളുകള്ക്കാണ് മോള്ഡോവയുടെ വെല്ലുവിളി മറികടന്നത്. കളിയുടെ 80-ാം മിനിറ്റില് റോബ്സണ് കാനുവും പരിക്കുസമയത്ത് റംസിയുമാണ് വെയ്ല്സിനായി ഗോള് നേടിയത്. മറ്റൊരു മത്സരത്തില് ജോര്ജിയയാണ് 1-1ന് ആസ്ട്രിയയെ സമനിലയില് തളച്ചത്. 14 പോയിന്റുമായി വെയ്ല്സും 13 പോയിന്റുമായി അയര്ലന്ഡുമാണ് ഗ്രൂപ്പില് രണ്ടും മൂന്നും സ്ഥാനത്ത്.
ഗ്രൂപ്പ് ഐയില് നടന്ന മത്സരങ്ങളില് ഐസ്ലന്ഡ്, ഫിന്ലന്ഡ്, തുര്ക്കി ടീമുകള് വിജയം നേടി. തുര്ക്കി മറുപടിയില്ലാത്ത ഏക ഗോളിന് കരുത്തരായ ക്രൊയേഷ്യയെയും ഐസ്ലന്ഡ് 2-0ന് ഉക്രെയ്നെയും പരാജയപ്പെടുത്തിയപ്പോള് ഫിന്ലന്ഡിന്റെ വിജയം ഏകപക്ഷീയമായ ഒരു ഗോളിന് കൊസോവക്കെതിരെയായിരുന്നു.
പരാജയപ്പെട്ടെങ്കിലും 8 കളികളില് നിന്ന് 16 പോയിന്റുമായി ക്രൊയേഷ്യയാണ് ഗ്രൂപ്പില് മുന്നില്. 16 പോയിന്റ് തന്നെയുള്ള ഐസ്ലന്ഡ് രണ്ടാമതും 14 പോയിന്റുമായി തുര്ക്കിയും ഉക്രെയ്നും മൂന്നും നാലും സ്ഥാനത്ത് നില്ക്കുന്നു.
