‘ഡബിള്‍’ സെഞ്ചുറി ഇന്ത്യ കുതിച്ചു

കൊളംബോ: നായകന്‍ വിരാട് കോഹ് ലിയും ഓപ്പണര്‍ രോഹിത് ശര്‍മയുടെയും സെഞ്ചുറികളില്‍ ഇന്ത്യക്ക് ഉജ്ജ്വല വിജയം. നാലാം ഏകദിന ക്രിക്കറ്റ് മത്സരത്തില്‍ അവര്‍ 168 റണ്‍സിന് ശ്രീലങ്കയെ തോല്‍പ്പിച്ചു. ഇതോടെ അഞ്ചു മത്സരങ്ങളുടെ പരമ്പരയില്‍ ഇന്ത്യക്ക് 4-0 ന്റെ ലീഡായി.

‘ഡബിള്‍’ സെഞ്ചുറിയുടെ മികവില്‍ 50 ഓവറില്‍ അഞ്ചുവിക്കറ്റിന് 375 റണ്‍സ് പടുത്തുയര്‍ത്തിയ ഇന്ത്യ 42.4 ഓവറില്‍ 207 റണ്‍സിന് ശ്രീലങ്കയെ പുറത്താക്കി.

രോഹിത് ശര്‍മ 88 പന്തില്‍ പതിനൊന്ന് ഫോറും മൂന്ന് സിക്‌സറും പൊക്കി 104 റണ്‍സ് നേടി. രോഹിതിന്റെ 13-ാം സെഞ്ചുറിയാണിത്. അടിച്ചുതകര്‍ത്ത കോഹ്‌ലി 96 പന്തില്‍ പതിനേഴുഫോറും രണ്ട് സിക്‌സറും അടക്കം 131 റണ്‍സ് എടുത്തു. കോഹ് ലിയുടെ 29-ാം സെഞ്ചുറിയാണിത്. മലിംഗയ്‌ക്ക് വിക്കറ്റ് സമ്മാനിച്ചാണ് കോഹ് ലി മടങ്ങിയത്.രണ്ടാം വിക്കറ്റില്‍ രോഹിത് ശര്‍മയും കോഹ് ലിയും 219 റണ്‍സിന്റെ കൂട്ടുകെട്ടുണ്ടാക്കി.

ശ്രീലങ്കന്‍ ബാറ്റിങ് നിരയില്‍ മാത്യൂസിന് മാത്രമെ ഇന്ത്യന്‍ ആക്രമണത്തിന് മുന്നില്‍ പിടിച്ചു നില്‍ക്കാനായൊള്ളൂ. 80 പന്തില്‍ മാത്യൂസ് 70 റണ്‍സ് നേടി. സിരിവര്‍ധന 39 റണ്‍സും ഡിസില്‍വ 22 റണ്‍സും നേടി.

ഹാര്‍ദിക് പാണ്ഡ്യ, ബുംറ, കുല്‍ദീപ് യാദവ് എന്നിവര്‍ രണ്ടു വിക്കറ്റ് വീതം വീഴ്‌ത്തി. ടോസ് നേടി ബാറ്റിങ്ങ് തെരഞ്ഞെടുത്ത ഇന്ത്യയ്‌ക്ക് ഓപ്പണര്‍ ധവാനെ നാല് റണ്‍സിന് നഷ്ടമായി. തുടര്‍ന്നെത്തിയ കോഹ് ലി രോഹിതിനൊപ്പം സ്‌കോര്‍ ഉയര്‍ത്തിക്കൊണ്ടുവന്നു. 30 ഓവറില്‍ കോഹ് ലി മടങ്ങിയതോടെ ഈ കൂട്ടുകെട്ട് തകര്‍ന്നു. മലിംഗയ്‌ക്കാണ് വിക്കറ്റ്.ഏകദിനത്തില്‍ മലിംഗയുടെ 300-ാം വിക്കറ്റാണിത്.

ഹാര്‍ദിക് പാണ്ഡ്യയും (19) രാഹുലും(7) അനായാസം കീഴടങ്ങി. എന്നാല്‍ മുന്നൂറാം ഏകദിനം കളിക്കാനിറങ്ങിയ മുന്‍ നായകന്‍ ധോണി മനീഷ് പാണ്ഡ്യയ്‌ക്കൊപ്പം പിടിച്ചു നിന്നതോടെ ഇന്ത്യന്‍ സ്‌കോര്‍ ഉയര്‍ന്നു.

മനീഷ് പാണ്ഡ്യ 42 പന്തില്‍ നാലെണ്ണം അതിര്‍ത്തികടത്തി 50 റണ്‍സ് കുറിച്ച് പുറത്താകാതെ നിന്നു. മികച്ച ഫോം തുടരുന്ന ധോണി 42 പന്തില്‍ അഞ്ചു ബൗണ്ടറിയടിച്ച് 49 റണ്‍സുമായി കീഴടങ്ങാതെ നിന്നു. അഭേദ്യമായ ആറാം വിക്കറ്റില്‍ ഇവര്‍ 101 റണ്‍സ് അടിച്ചെടുത്തു.

സ്‌കോര്‍ ബോര്‍ഡ്

ഇന്ത്യ: രോഹിത് ശര്‍മ സി ഡിക്ക്‌വെല്ല ബി മാത്യൂസ് 104, എസ്.ധവാന്‍ സി പുഷ്പകുമാര ബി ഫെര്‍നാന്‍ഡോ 4, വി.കോഹ് ലി സി മുനവീര ബി മലിംഗ 131, ഹാര്‍ദിക് പാണ്ഡ്യ സി ഡിസില്‍വ ബി മാത്യൂസ് 19, കെ.എല്‍ രാഹുല്‍ സി ഡിസില്‍വ ബി ധനഞ്ജയ 7, മനീഷ് പാണ്ഡ്യ നോട്ടൗട്ട് 50, എം.എസ് ധോണി നോട്ടൗട്ട് 49, എക്‌സ്ട്രാസ് 11, ആകെ 50 ഓവറില്‍ അഞ്ചുവിക്കറ്റിന് 375

ബൗളിങ്ങ്: മലിംഗ 10-0-82-1, ഫെര്‍നാന്‍ഡോ 8-1-76-1, മാത്യൂസ് 6-2-24-2, പുഷ്പകുമാര 9-0-65-0, ധനഞ്ജയ 10-0-68-1, ഡിസില്‍വ 2-0-19-0,സിരിവര്‍ധന 5-0-36-0.