കണ്ണൂര്: പുനര്ജ്ജനി പദ്ധതിയിലൂടെ സര്ക്കാര് ആശുപത്രികളില് അടിസ്ഥാന സൗകര്യങ്ങള് ഏര്പ്പെടുത്തുന്നു. സുസ്ഥിര വികസനം മുന്നിര്ത്തി സര്ക്കാര് നടപ്പിലാക്കുന്ന നവകേരള പദ്ധതിയുടെ ഭാഗമായാണ് ആതുരാലയങ്ങളിലെ അടിസ്ഥാന സൗകര്യങ്ങള് പുനരുജ്ജീവിപ്പിക്കാന് എന്എസ്എസ് ടെക്നിക്ക് സെല് പുനര്ജ്ജനി പദ്ധതിയുമായി മുന്നോട്ടുവന്നിട്ടുള്ളത്.
യഥാസമയം അറ്റകുറ്റപ്പണികള് നടത്താതെവരുന്നതുകൊണ്ട് അടിസ്ഥാന സൗകര്യങ്ങള് പരിമിതപ്പെടുന്ന അവസ്ഥ വളണ്ടിയര്മാരുടെ സന്നദ്ധ സേവനത്തിലൂടെ ഇല്ലാതാക്കാന് രൂപകല്പനചെയ്ത പദ്ധതിയാണ് പുനര്ജ്ജനി. ആശുപത്രികളില് ഉപയോഗശൂന്യമായിക്കിടക്കുന്ന ഉപകരണങ്ങള്, ഓപ്പറേഷന് ടാബിളുകള്, നെബുലൈസറുകള്, ബിപ്പിഅപ്പാരറ്റ്സ്, കട്ടിലുകള്, മേശകള്, ഡ്രിപ്പ് സ്റ്റാന്റുകള്, ട്രോളികള്, വീല്ചെയറുകള്, വൈദ്യുത ജലവിതരണ സംവിധാനങ്ങള്, മാലിന്യ സംസ്കരണ സംവിധാനങ്ങള്, കെട്ടിടങ്ങളുടെ മരാമത്തുപണികള് എന്നിവയാണ് ഈ പദ്ധതിയിലൂടെ പ്രവര്ത്തന സജ്ജമാക്കുന്നത്.
ഇതിന്റെ ഭാഗമായുള്ള ക്യാമ്പുകള് ഓണം അവധിക്കാലത്ത് സംസ്ഥാനത്തിന്റെ വിവിധ ഭാഗങ്ങളില് നടക്കും. ജില്ലയിലെ തളിപ്പറമ്പ്, കൂത്തുപറമ്പ്, താലൂക്ക് ആശുപത്രികളിലും മയ്യില്, മട്ടന്നൂര് പിഎച്ച്സികളിലും കണ്ണൂര് ഗവ.പോലിടെക്നിക്ക് കോളേജിലുമാണ് പദ്ധതി നടപ്പിലാക്കുന്നത്. സംസ്ഥാനത്തൊട്ടാകെ 53 സര്ക്കാര് ആശുപത്രികളിലും ജില്ലയിലെ രണ്ട് സര്ക്കാര് പോളിടെക്നിക്കുകളുമാണ് ഈ വര്ഷം പുനര്ജ്ജനി പദ്ധതിയുടെ കീഴില് പുനരുദ്ധാരണ പ്രവര്ത്തനങ്ങള് നടത്താന് തിരഞ്ഞെടുക്കപ്പെട്ടിരിക്കുന്നത്.
യുവത്വം ആസ്തികളുടെ പുനര് നിര്മ്മാണത്തിനായി എന്ന ലക്ഷ്യം മുന്നിര്ത്തിക്കൊണ്ട് യുവജനങ്ങളെ രാഷ്ട്ര പുനര്നിര്മ്മാണ പ്രക്രിയയില് പങ്കാളികളാക്കുക, സാമൂഹ്യ സേവനത്തിലൂടെ സ്വയം വളരുവാന് അവസരം നല്കുക എന്നീ ലക്ഷ്യങ്ങളോടെയാണ് നാഷണല് സര്വ്വീസ് സ്കീം ടെക്നിക്കല് സെല് പദ്ധതി നടപ്പിലാക്കുന്നത്. ഓണം അവധിക്കാലത്തെ ഏഴ് ദിവസങ്ങളിലായി നടത്തുന്ന ക്യാമ്പുകളിലൂടെ പത്തുകോടിയിലേറെ രൂപയുടെ ആസ്തികള് പുനര്സൃഷ്ടിക്കാനാണ് പദ്ധതി.
