പലെക്കലെ: വിജയത്തിന്റെ സൂത്രവാക്യം ശ്രീലങ്കയ്ക്ക് നഷ്ടമായെന്ന് ക്യാപ്റ്റന് ചമര കപുഗദര. നാലാം ഏകദിനത്തിന് മുമ്പ് പോരയ്മകള് പരിഹരിച്ച് കൂടുതല് ഉത്തരവാദിത്വത്തോടെ കളിക്കാന് അദ്ദേഹം ടീമംഗങ്ങളോട് ആവശ്യപ്പെട്ടു. മൂന്നാം ഏകദിനത്തില് ഇന്ത്യയില് നിന്ന് ആറുവിക്കറ്റ് തോല്വി ഏറ്റുവാങ്ങിയശേഷം മാധ്യമങ്ങളോട് സംസാരിക്കുകയായിരുന്നു ചമര. പുറത്ത് നിന്ന് പ്രശ്നങ്ങളൊന്നുമില്ല.
വിജയ സൂത്രവാക്യം ടീം മറന്നെന്നാണ് എന്റെ വിശ്വാസം. തോല്വികള് തുടര്ച്ചയാകുമ്പോള് വിജയത്തിനടുത്തെത്തിയ മത്സരങ്ങളിലും പരാജയപ്പെടുന്നത് സ്വഭാവികമാണ്. ഒരു മത്സരത്തിലെങ്കിലും വിജയം നേടിയാല് അവിടെ നിന്ന് വിജയപടവുകള് കയറാനാകും. ബൗളര്മാരുടെ പ്രകടനത്തില് ചമര തൃപ്തനാണ്. ബാറ്റ്സ്മാന്മാര് സ്ഥിരമായി പരാജയപ്പെടുകയാണ്. ഇതിന് മാറ്റം വരണം. മാന്യമായ സ്കോര് പടുത്തുയര്ത്തിയാല് വിജയിക്കാനാകുമെന്ന് ചമര പറഞ്ഞു. പലെക്കലെയിലെ മൂന്നാം മത്സരത്തില് ഇന്ത്യ ജയത്തിനടുത്തെത്തിയപ്പോള് ശ്രീലങ്കന് ആരാധകര് ഗ്രൗണ്ടിലേക്ക് കുപ്പികള് വലിച്ചെറിഞ്ഞു.
തുടര്ന്ന് കാണികളെ ഒഴിപ്പിച്ചശേഷമാണ് മത്സരം പൂര്ത്തിയാക്കിയത്. രോഹിത് ശര്മ നേടിയ സെഞ്ചുറിയുടെ മികവില് ഇന്ത്യ ആറു വിക്കറ്റിന്റെ വിജയം നേടി. ഇതോടെ മൂന്ന് മത്സരങ്ങളുടെ പരമ്പര ഇന്ത്യക്ക് സ്വന്തമായി. നാലാം ഏകദിന മത്സരം വ്യാഴ്ഴച കൊളംബോയില് നടക്കും.
ചാണ്ടിമല് കളിക്കില്ല
ശ്രീലങ്കന് ബാറ്റ്സ്മാന് ദിനേശ് ചാണ്ടിമല് ഇന്ത്യക്കെതിരായ ഏകദിന പരമ്പരയിലെ അവസാന രണ്ട് മത്സരങ്ങളില് കളിക്കില്ല. മൂന്നാം മത്സരത്തിനിടയ്ക്ക് പരിക്കേറ്റതിനെ തുടര്ന്നാണിത്. പലെക്കലെ സ്റ്റേഡിയത്തില് നടന്ന മൂന്നാം മത്സരത്തില് ഹാര്ദിക് പാണ്ഡ്യയുടെ ബൗണ്സര് കൈയില് തട്ടിയാണ് ചാണ്ടിമലിന് പരിക്കേറ്റത്. മത്സരത്തില് ആറു വിക്കറ്റിന് വിജയിച്ച പരമ്പരയില് ഇന്ത്യ 3-0 ന് ലീഡ് നേടി.
പന്തുകൊണ്ട് വലത്തെ തള്ളവിരലിന് പരിക്കേറ്റ് ടെസ്റ്റ് ക്യാപ്റ്റന് ദിനേശ് ചാണ്ടിമല് ഇന്ത്യക്കെതിരായ ശേഷിക്കുന്ന മത്സരങ്ങളില് കളിക്കിലെന്ന് ശ്രീലങ്കന് ക്രിക്കറ്റ് ബോര്ഡ് പ്രസ്താവനയില് അറിയിച്ചു. ഇന്ത്യ, ശ്രീലങ്ക ടീമുകള് നാലാം ഏകദിനത്തിനായി കൊളംബോയിലേക്ക് യാത്രതിരിച്ചു.വ്യാഴാഴ്ചയാണ് നാലാം ഏകദിനം. അഞ്ചാം മത്സരം ഞായറാഴ്ച നടക്കും. ഏക ട്വന്റി 20 മത്സരം അടുത്തമാസം ആറിന് അരങ്ങേറും.
