കുടിവെള്ളപ്രശ്‌നം വീണ്ടുമെത്തുന്നു; തടാകം വറ്റിവരളുന്നു

കുന്നത്തൂര്‍: കാലവര്‍ഷം കുറഞ്ഞതോടെ ശാസ്താംകോട്ട തടാകം വരളുന്നു. ഇന്നലെ തടാകത്തിലെ ജലനിരപ്പ് രേഖപ്പെടുത്തിയത് മൈനസ് 42 സെ.മി. ആണ്. കഴിഞ്ഞ വര്‍ഷം മൈനസ് 20 സെ.മി. രേഖപ്പെടുത്തിയ സ്ഥാനത്താണ് ഇത്. 22 സെന്റീമീറ്ററിന്റെ കുറവ്. കാലവര്‍ഷം ഇനിയും ശക്തിപ്രാപിച്ചില്ലെങ്കില്‍ തടാകം അതിവേഗം വറ്റിവരളും. ബദല്‍ കുളിവെള്ള പദ്ധതിയായ കല്ലട കുടിവെള്ള പദ്ധതി ഏതാണ്ട് ഉപേക്ഷിച്ച മട്ടാണ്. ഇപ്പോള്‍ ദിനംപ്രതി 35 എംഎല്‍ഡി ജലമാണ് തടാകത്തില്‍ നിന്നും എടുക്കുന്നത്. ശക്തമായുണ്ടാകുന്ന ചൂടുമൂലവും ജലനിരപ്പ് കുറയുന്നുണ്ട്. വേനല്‍കാലത്ത് റെക്കോര്‍ഡ് താഴ്ചയായ മൈനസ് 166 വരെ എത്തിയിരുന്നു. ഈ വര്‍ഷം വേനലില്‍ കുടിവെള്ളത്തിനായി കനാലിനെയും ആശ്രയിച്ചിരുന്നു. എന്നിട്ടും തടാകത്തിലെ ജലനിരപ്പ് കുറയുന്നത് ആശങ്കപ്പെടുത്തുന്നു. ബദല്‍കുടിവെള്ള പദ്ധതികള്‍ എത്രയും വേഗം പ്രാവര്‍ത്തികമാക്കണമെന്നാണ് തടാകസ്‌നേഹികളുടെ ആവശ്യം.