തൊടുപുഴ: നഗരത്തില് ബിജെപി, യുവമോര്ച്ച പ്രവര്ത്തകരുടെ മണിക്കൂറുകള് നീണ്ട സമരം ഫലം കണ്ടു. തൊടുപുഴ ആറ്റിലേയ്ക്ക് കക്കൂസ് ടാങ്കില് നിന്നടക്കം മാലിന്യം തള്ളിയ ബാര് ഹോട്ടലാണ് സമരത്തെ തുടര്ന്ന് നഗരസഭ അധികൃതര് ഇടപെട്ട് പൂട്ടിച്ചത്. നിര്മ്മാണംപുരോഗമിക്കുന്ന കെഎസ്ആര്ടിസി ബസ് ടെര്മിലിന് സമീപം പ്രവര്ത്തിക്കുന്ന പേള് റോയല് എന്ന ബാര് ഹോട്ടലാണ് ഇന്നലെ വൈകിട്ട് അഞ്ച് മണിയോടെ പൂട്ടാന് നഗരസഭ നിര്ദ്ദേശം നല്കിയത്.
ഉച്ചയോടെ തൊടുപുഴയാറ്റില് ഓയില് പടര്ന്നൊഴുകുന്നത് തൊടുപുഴയില് സമ്മേളനത്തിനെത്തിയ ബിജെപി പ്രവര്ത്തകരുടെ ശ്രദ്ധയില്പ്പെട്ടു. തുടര്ന്ന് ഇത് എവിടെ നിന്ന് ഒഴുകുന്നു എന്ന അന്വേഷണമൂപ്പില്ക്കടവ് പാലത്തിന് സമീപത്ത് എത്തുകയായിരുന്നു.
ബാറും ഹോട്ടലുകളും സര്വ്വീസ് സ്റ്റേഷനുമുള്പ്പെടെ മൂന്ന് സ്ഥാപനങ്ങളിലൊന്നില് നിന്നാണ് ഓയില് പുഴയിലേക്കൊഴുക്കുന്നതെന്നായിരുന്നു പ്രവര്ത്തകരുടെ ആരോപണം. നഗരസഭാ അധികൃതര് സ്ഥലത്തെത്തി പരിശോധന നടത്തണമെന്നാവശ്യപ്പെട്ട് പ്രവര്ത്തകര് റോഡ് ഉപരോധം തുടങ്ങി.
സംഭവമറിഞ്ഞ് വന് പോലീസ് സംഘവും സ്ഥലത്തെത്തി. ഏറെ വൈകി ചെയര്പേഴ്സന്റെ നേതൃത്വത്തില് ആരോഗ്യ വകുപ്പധികൃതര് ഉള്പ്പെടെയുള്ളവര് സ്ഥലത്തെത്തി. ഹോട്ടലുകള്ക്ക് സമീപത്തുകൂടി പുഴയിലേക്കൊഴുകുന്ന ഓടയില് നിന്നും മലിന ജലം പുഴയിലേക്കൊഴുകുന്നതായി പരിശോധനയില് വ്യക്തമായി. പക്ഷേ എവിടെ നിന്നാണെന്ന് കണ്ടെത്താനായില്ല. തുടര്ന്ന് അഗ്നിശമന സേനാംഗങ്ങള് ഓടയുടെ മാന് ഹോളിലിറങ്ങി പരിശോധിച്ചെങ്കിലും ഉറവിടം വ്യക്തമായില്ല.
അപ്രതീക്ഷിതമായി മലിന ജലം
പരിശോധന തല്കാലം നിര്ത്തി അടുത്ത ദിവസത്തേക്ക് മാറ്റി വക്കാന് തീരുമാനിച്ചപ്പോഴാണ് അപ്രതീക്ഷിതമായി ഓട നിറയെ മലിന ജലം കുത്തിയൊഴുകി വന്നത്.
ഇതിന്റെ ഉറവിടം തേടിയുള്ള പരിശോധനയില് പേള് റോയലിലെ കക്കൂസ് ടാങ്കില് നിന്നുമാണ് വെള്ളം ഒഴുകിയെത്തുന്നതെന്ന് വ്യക്തമായി. എന്നാല് കുടിവെള്ള ടാങ്ക് വൃത്തിയാക്കിയപ്പോള് ഒഴുകി വന്ന ജലമാണ് ഇതെന്നാണ് ഉടമയുടെ നിലപാട്.
ഇന്ന് പരിശോധന തുടരും
ഇന്ന് രാവിലെ നഗരസഭ എ.ഇയുടെ നേതൃത്വത്തിലുള്ള വിദഗ്ധ സംഘത്തിന്റെ പരിശോധനകള്ക്ക് ശേഷം ബാറിന്റെ ലൈസന്സ് റദ്ദ് ചെയ്യുന്നതടക്കമുള്ള നടപടികളിലേക്ക് കടക്കുമെന്ന് നഗരസഭ ചെയര്പേഴ്സണ് സഫിയ ജബ്ബാര്, വൈസ് ചെയര്മാന് ടി.കെ.സുധാകരന് നായര് എന്നിവര് പറഞ്ഞു.
