ആലപ്പുഴ: നെഹ്റു ട്രോഫി വള്ളംകളിയുടെ ഭാഗമായി വര്ഷംതോറും നടത്തുന്ന വിദ്യാര്ഥികളെ ഉള്പ്പെടുത്തിയുള്ള വിളംബര ഘോഷയാത്ര ഒഴിവാക്കണമെന്ന് ആവശ്യം ഉയരുന്നു. വിദ്യാലയ അധികൃതരോടു നിര്ബന്ധമായി ആവശ്യപ്പെടുന്നതിനാലാണ് മനസ്സില്ലാമനസ്സോടെ കുട്ടികളെ അയക്കുന്നത്.
കുട്ടനാടിന്റെ തനതായ വള്ളംകളി കാണാന് കുറഞ്ഞ ചിലവിലും സുരക്ഷിതമായും വിദ്യാര്ഥികള്ക്കു അവസരം ഒരുക്കുന്നതിനു പകരം പരസ്യത്തിന്റെയും പ്രചാരണത്തിന്റെയും ഭാഗമായി മാത്രം അവരെ ഉപയോഗിക്കുന്നതില് മാതാപിതാക്കളില് നിന്നു എതിര്പ്പുയരുന്നു. നഗരസഭാ കൗണ്സിലര്മാര്ക്കും ചില പതിവു സാംസ്ക്കാരിക നായകര്ക്കും ‘പ്രകടനം’ നയിക്കുന്നതിനുള്ള കേവലം അണികളായി കുട്ടികളെ ദുരുപയോഗം ചെയ്യുകയാണെന്നും വിമര്ശനം ഉയരുന്നു.
മഴയത്തോ, വെയിലത്തോ വിദ്യാര്ഥികളെ ക്ലേശത്തിലാക്കി നടത്തുന്ന സാംസ്കാരിക ഘോഷയാത്രവേളയില് അനേകം കുട്ടികള് ക്ഷീണിച്ചു മോഹാലസ്യപ്പെട്ടു വീഴാറുണ്ട്. പലര്ക്കും അടുത്ത ദിവസങ്ങളില് പനിയും മറ്റ് അസുഖങ്ങളും പിടിപെടും.
ഒരു സൊസൈറ്റിയുടെ ആഭിമുഖ്യത്തില് നടത്തുന്ന ഘോഷയാത്രയില് ഏതു ചട്ടത്തിന്റെ അടിസ്ഥാനത്തിലാണ് ഇങ്ങനെ നിര്ബന്ധിതമായി വിദ്യാര്ത്ഥികളെ പങ്കെടുപ്പിച്ചു പരിപാടി നടത്തുന്നതെന്നു വ്യക്തമല്ല. വിദ്യാര്ത്ഥികള്ക്കായി മുന്വര്ഷങ്ങളില് നടത്തിയ വിവിധ മത്സരങ്ങളില് പ്രഖ്യാപിച്ചിരുന്നതു പ്രകാരം സമ്മാനങ്ങള് നല്കിയിട്ടില്ലെന്നും പരാതിയുണ്ട്.
