ഒരു കാലത്ത് ( ഏകദേശം 30 വര്‍ഷങ്ങള്‍ക്കുമുമ്പുവരെ) നാട്ടിന്‍പുറത്തെ ഓരോ മുറ്റവും-തൊടിയും ഔഷധ സസ്യങ്ങളുടെ കലവറ തന്നെയായിരുന്നു. വീട്ടമ്മമാര്‍ അതുപരമാവധി പ്രയോജനപ്പെടുത്തിയുമിരുന്നു. ആധുനിക വിദ്യാഭ്യാസവും ആധുനിക ചികിത്സാരീതിയും വന്നതോടെ വിലപ്പെട്ട നാട്ടറിവുകളും ഏറ്റം കുറ്റമറ്റ യാതൊരു പാര്‍ശ്വഫലങ്ങളുമില്ലാത്ത ഒറ്റമൂലി പ്രയോഗം എന്നന്നേക്കുമായി അപ്രത്യക്ഷപ്പെടുകയും ചെയ്തു.
ഇന്ന് പല വിദേശികളും ഭാരതത്തിന്റെ തനതു ചികിത്സാരീതിയെപ്പറ്റി പഠിച്ചും ഗവേഷണം നടത്തിയും അമൂല്യ ഔഷധങ്ങള്‍ നമ്മുടെ വീട്ടുമുറ്റത്തു കണ്ടുവരുന്നത് നമ്മള്‍ പുച്ഛിച്ചു തളളിയതുമായ ചെടികളില്‍ നിന്നും ഉല്പാദിപ്പിച്ച് അതുതന്നെ നമുക്ക് ഭീമമായ തുകയ്‌ക്ക് വില്ക്കുകയും ചെയ്തു വരുന്നുണ്ട്. നമ്മള്‍ ഇപ്പോഴും പഠിച്ച കഴുതകളായി തുടരുകയും ചെയ്യുന്നു.
ഇവിടെ നമ്മുടെ സമൂഹത്തെ അടച്ചാക്ഷേപിക്കുവാനോ കുറ്റപ്പെടുത്തുവാനോ ഞാന്‍ ശ്രമിക്കുന്നില്ല. എന്റെ പൂര്‍വ്വികന്മാരില്‍ നിന്നും എനിക്കു ലഭിച്ച അറിവുകള്‍ ആര്‍ക്കെങ്കിലും ഉപകാരപ്പെടട്ടെ എന്നു കരുതിയാണ് ഞാനിതു കുത്തിക്കുറിക്കുന്നത്. ഇതില്‍ പറയുന്ന ഔഷധപ്രയോഗങ്ങള്‍ ഫലം കണ്ടിട്ടുളളവയാണ്. ഫലസിദ്ധി നേരിട്ടുകാണാത്ത ഒന്നും ഞാനിവിടെ കുറിക്കുന്നില്ല എന്നു കൂടി പറഞ്ഞുകൊളളട്ടെ.
(1)അകത്തി :- സംസ്‌കൃതപേര്: അഗസ്തിമുനി ദ്രുമം അഗസ്തിക:
അഗസ്ത്യ മുനിയുടെ ഇഷ്ടഭോജ്യമായതിനാലാകാം ഇതിന് ”മുനിദ്രുമം” എന്ന പേരുണ്ടായത്.
തമിഴ് : അഗത്തി
ശാസ്ത്രീയനാമം: സെസ്‌ബേനിയ ഗ്രാന്റിഫ്‌ളോറ.
എവിടെ കാണാം: ഇന്ത്യയിലുടനീളം കാണാം. ഒരു ചെറുമരമാണ്. മഴകുറഞ്ഞ മേഖലകളില്‍ കണ്ടു വരുന്നു.
ഉപയോഗം: ഇതിനെ കറിയായി കേരളത്തിലും വ്യാപകമായി തമിഴ്‌നാട്ടിലും ഉപയോഗിച്ചു വരുന്നു. ഇലകളില്‍ വിറ്റാമിന്‍ എബിസി എന്നിവധാരാളമായുണ്ട്. കൂടാതെരക്തത്തിലേക്ക് നേരിട്ടു പ്രവേശിക്കുന്ന കാത്സ്യവും ഫോസ്ഫറസും ഉണ്ട്.
പുനരുല്‍പാദനം:- വിത്തുകള്‍ നട്ട് പുനരുല്‍പാദനം നടത്താം. ചോലനല്‍കാത്തതുകൊണ്ട് എവിടെയും നടാം.
ഔഷധ പ്രയോഗങ്ങള്‍:- ഇലപിഴിഞ്ഞ് നീര് അരിച്ചെടുത്ത് രണ്ടുതുളളിവീതം മൂക്കിലൊഴിച്ച് വായിലേക്ക് വലിച്ചെടുക്കുന്നതുവഴി(നസ്യം) മുഷ്ടപീനസം (മൂക്കിലൂടെ കഫവും വെളളവും വരുന്ന രോഗം) മാറിക്കിട്ടും. അപസ്മാര രോഗികള്‍ക്കും അര്‍ദ്ദിത രോഗികള്‍ക്കും ഈ നസ്യം വളരെ ഗുണം ചെയ്യും. (അര്‍ദ്ദിതമെന്നാല്‍ വായും ചൊടികളും ഒരു വശത്തേക്ക് കോടിപ്പോവുകയും ചില അക്ഷരങ്ങള്‍ …പറയാന്‍ പറ്റാതെ വരികയും വായ് ശരിക്കും അടയാത്തതിനാല്‍ കടവായ് കോണിലൂടെ ഉമിനീരൊലിപ്പിക്കുകയും ചെയ്യുന്ന വാതരോഗത്തെ അര്‍ദ്ദിതമെന്നു പറയുന്നു).
അകത്തിയുടെ പൂവ് ഇടിച്ചു പിഴിഞ്ഞ് നീര് ദിവസവും 15 മില്ലി (1/4 തുടം) വീതം രണ്ടു നേരം കഴിക്കുന്നത് അസ്ഥിസ്രാവം, പ്രദരം, പൂയസ്രാവം ഇവയ്‌ക്ക് ആശ്വാസം നല്‍കും. (അസ്ഥിസ്രാവമെന്നാല്‍ യോനിയിലൂടെ കൊഴുത്ത ഇളം വെളള, മഞ്ഞ, ചുവപ്പ് എന്നീനിറങ്ങളില്‍ ഒഴുകുന്നതും ദുര്‍ഗന്ധമുണ്ടാക്കുന്നതും ചൊറിച്ചിലുണ്ടാക്കുന്നതുമായ രോഗം. മേല്‍ ഒഴുക്കിന് ശക്തി കൂടിയാല്‍ പ്രദരം, യോനിയില്‍ നിന്ന് പഴുപ്പ് വന്നാല്‍ പൂയസ്രാവം.)
കുരുക്കളും നീരുകളും പൊട്ടി ദുഷ്ട് പുറത്തു പോകാന്‍ അകത്തി കുരു പാലില്‍ അരച്ച് തേയ്‌ക്കുന്നത് നല്ലതാണ്.
