കണ്ണൂര്: ഗുണനിലവാരത്തിലും രൂപഭംഗിയിലും ഏറെ മികച്ചുനില്ക്കുന്ന കണ്ണൂര് കൈത്തറിയെ അന്താരാഷ്ട്ര ബ്രാന്റാക്കി മാറ്റണമെന്ന് പി.കെ.ശ്രീമതി എംപി അഭിപ്രായപ്പെട്ടു. മൂന്നാമത് ദേശീയ കൈത്തറി ദിനാചരണം ഉദ്ഘാടനം ചെയ്ത് സംസാരിക്കുകയായിരുന്നു അവര്. കൈത്തറിയെ ശക്തിപ്പെടുത്തുകയും പ്രോല്സാഹിപ്പിക്കുകയും ചെയ്യുന്നതില് ജില്ലാ കലക്ടര് മീര് മുഹമ്മദലി നടത്തിക്കൊണ്ടിരുന്ന ശ്രമങ്ങളെ എംപി അഭിനന്ദിച്ചു. കൈത്തറിയുടെ കണ്ണൂര് ബ്രാന്റിനെ കാന്ലൂം എന്ന പേരില് ഓണ്ലൈന് വ്യാപാരരംഗത്ത് എത്തിക്കാനായത് മേഖലയെ സംബന്ധിച്ചിടത്തോളം വലിയ നേട്ടമാണ്. കൈത്തറി മേഖയ്ക്ക് വലിയ പ്രാധാന്യമാണ് സംസ്ഥാന സര്ക്കാര് നല്കുന്നത്. സ്കൂള് വിദ്യാര്ഥികളുടെ യൂനിഫോം കൈത്തറിയാക്കാനുള്ള തീരുമാനം ഇതിന്റെ ഭാഗമായിരുന്നു. കൈത്തറിയെ ശക്തിപ്പെടുത്താനുള്ള ഏത് ശ്രമങ്ങള്ക്കും സര്ക്കാരിന്റെ പിന്തുണയുണ്ടാവുമെന്നും എംപി പറഞ്ഞു.
മുണ്ട്, വിരിപ്പ് തുടങ്ങിയ പരിമിതമായ ഇനങ്ങളില് ഒതുങ്ങിനിന്നിരുന്ന കൈത്തറി ഇന്ന് ജില്ലയില് 400ലേറെ വൈവിധ്യപൂര്ണമായ ഉല്പ്പന്നങ്ങള് വിപണിയിലിറക്കുന്നുണ്ടെന്നത് അഭിമാനകരമായ നേട്ടമാണെന്ന് ചടങ്ങില് മുഖ്യാതിഥിയായിരുന്ന കെ.കെ.രാഗേഷ് എംപി പറഞ്ഞു. ആഗോള വിപണിയില് കൈത്തറിക്ക് വലിയ ഡിമാന്റുണ്ട്. ഈ സാധ്യത പരമാവധി ഉപയോഗപ്പെടുത്താന് സൊസൈറ്റികള്ക്ക് സാധിക്കണമെന്നും അദ്ദേഹം പറഞ്ഞു.
ഓണ്ലൈന് വ്യാപാരത്തിലേക്ക് ജില്ലയിലെ കൂടുതല് സൊസൈറ്റികളും അവരുടെ കൂടുതല് ഉല്പ്പന്നങ്ങളും വരേണ്ടതുണ്ടെന്ന് ചടങ്ങില് അധ്യക്ഷത വഹിച്ച ജില്ലാ കലക്ടര് മീര് മുഹമ്മദലി പറഞ്ഞു. നിഫ്റ്റ് ഡയരക്ടര് ഡോ.എന്.ഇളങ്കോവന്, ജോ.ഡയരക്ടര് രമേഷ് ബാബു, എന്എച്ച്ഡിസി സീനിയര് മാനേജര് അരുണ് ബാരപത്രെ, കേന്ദ്ര ടെക്സ്റ്റൈല്സ് കമ്മിറ്റി അസി. ഡയരക്ടര് കെ.ടി.ജയരാജന്, ആര്.മഹേഷ് കുമാര്, ടി.മുരളീധരന്, കെ.ടി.അബ്ദുല് മജീദ്, കെ.ചന്ദ്രന്, കെ.കലൈശെല്വി, സി.ജയചന്ദ്രന്, പി.ബാലന് എം.രവിചന്ദ്രന്, സി സത്യമൂര്ത്തി തുടങ്ങിയവര് സംസാരിച്ചു.
ചേംബര് ഓഫ് കൊമേഴ്സ് ഹാളില് നടന്ന ചടങ്ങില് കൈത്തറി രംഗത്ത് സ്തുത്യര്ഹമായ സംഭാവനകള് നല്കിയ കെ.ആനന്ദന്, ഉത്തന്കണ്ണന്, കെ.നാരായണന്, കെ.പി.ദാമോദരന്, കെ.വി.രാഘവന് എന്നീ നെയ്ത്തുകാരെയും വീവേഴ്സ് സൊസൈറ്റികളെയും ആദരിച്ചു. പരിപാടിയോടനുബന്ധിച്ച് വിവിധ കൈത്തറി ഉല്പ്പന്നങ്ങളുടെ പ്രദര്ശനവും ഒരുക്കിയിരുന്നു.
