ആലപ്പുഴ: നഗരത്തിലെ കനാലോരങ്ങളില് അപകട ഭീഷണി ഉയര്ത്തുന്ന മരങ്ങള് മുറിച്ചു മാറ്റുന്നതിന് നടപടിയില്ല. 35 മരങ്ങള് മുറിച്ചു മാറ്റണമെന്ന് ആവശ്യപ്പെട്ട് കനാല് മാനേജ്മെന്റ് സൊസൈറ്റി വനംവകുപ്പിന് കത്ത് നല്കിയിട്ട് മാസങ്ങള് കഴിഞ്ഞിട്ടും നടപടിയില്ല. കനാലുകളില് നിരവധി മരങ്ങള് വീണു കിടക്കാന് തുടങ്ങിയിട്ട് വര്ഷങ്ങളായി. ചിലത് എതു നിമിഷവും നിലംപതിക്കാവുന്ന അവസ്ഥയിലാണ്. ഇക്കാര്യങ്ങള് ചൂണ്ടിക്കാട്ടിയാണ് കനാല്മാനേജ്മെന്റ് സൊസൈറ്റി വനംവകുപ്പിന് കത്ത് നല്കിയത്.
എന്നാല് അപകടങ്ങള് സംഭവിച്ചാല് മാത്രമെ ഇടപെടുകയുള്ളു എന്നതാണ് വനംവകുപ്പിന്റെ നിലപാടെന്ന് വിമര്ശനം ഉയരുന്നത്. കാലവര്ഷക്കാലത്ത് ശക്തമായ കാറ്റില് കനാലോരത്ത് നില്ക്കുന്ന കൂറ്റന് മരങ്ങള് കടപുഴകുന്നത് പതിവാണ്. പലപ്പോഴും ഭാഗ്യത്തിനാണ് വന് അപകടങ്ങള് ഒഴിവാകുന്നത്. കനാലുകളിലെ മരങ്ങള് മുറിച്ചു മാറ്റുന്നതിന് അനുമതി നല്കേണ്ടത് വനംവകുപ്പാണ്. മരത്തിന്റെ തടിയുടെ വീതിയും നീളവും അളന്ന് തിട്ടപ്പെടുത്തി വില നിശ്ചയിക്കേണ്ട ചുമതല വനുവകുപ്പിനാണ്. ഇതിനു ശേഷമെ മരങ്ങള് ലേലം ചെയ്യാന് കനാല് മാനേജ്മെന്റ് സൊസൈറ്റിക്ക് കഴിയുകയുള്ളു.
