ന്യൂദല്ഹി: ലോക അത്ലറ്റിക് ചാമ്പ്യന്ഷിപ്പിനുളള ഇന്ത്യന് ടീം തെരഞ്ഞെടുപ്പ് സംബന്ധിച്ച വിവാദം പുതിയ വഴിത്തിരിവില്. അവസാന നിമിഷം ഇന്റനാഷണല് അത്ലറ്റിക് ഫെഡറേഷന്റെ വൈല് കാര്ഡ് എന്ട്രി ലിസ്റ്റില് ഉള്പ്പെട്ട സ്റ്റീപ്പിള്ചെയ്സ് താരം സുധാ സിങ് ലോക ചാമ്പ്യന്ഷിപ്പില് മത്സരിക്കില്ലെന്ന് അത്ലറ്റിക് ഫെഡറേഷന് ഓഫ് ഇന്ത്യ വ്യക്തമാക്കി.
സുധാ സിങ് ചാമ്പ്യന്ഷിപ്പില് മത്സരിക്കില്ലെന്ന് ഇപ്പോള് ലണ്ടനില് ഇന്ത്യന് ടീമിനൊപ്പമുളള ഡെപ്യൂട്ടി നാഷണല് കോച്ച് രാധാകൃഷ്ണന് നായര് വാര്ത്ത ഏജന്സിയോട് പറഞ്ഞു.
ജൂലൈ 23 നു 24അംഗ ടീമിനെ പ്രഖ്യാപിച്ചശേഷം സുധയെ അത്ലറ്റിക് ഫെഡറേഷന് ടീമിലുള്പ്പെടുത്തിയാതായി അറിയില്ല. ഫെഡറേഷന് ഭാരവാഹികളുടെ പിഴവു മൂലമാണ് സുധയുടെ പേര് ഐഎഎഎഫിന്റെ വൈല്ഡ്കാര്ഡ് എന്ട്രി ലിസ്റ്റില് ഉള്പ്പെട്ടതെന്ന് രാധാകൃഷ്ണന് നായര് പറഞ്ഞു.
ഭൂവനേശ്വറില് നടന്ന ഏഷ്യന് ചാമ്പ്യന്ഷിപ്പില് സ്വര്ണമെഡല് നേടിയിട്ടും സുധയും പി.യു ചിത്രയും ഉള്പ്പെടെ മൂന്ന് താരങ്ങളെ ലോക ചാമ്പ്യന്ഷിപ്പിനുളള ഇന്ത്യന് ടീമില് നിന്ന് ഒഴിവാക്കിയിരുന്നു.
എന്നാല് ഐഎഎഎഫ് പുറത്തിറക്കിയ വൈല്ഡ്കാര്ഡ് എന്ട്രി ലിസ്റ്റില് സുധയുടെയും സ്പ്രിന്റ് താരം ദ്യൂതി ചന്ദിന്റെയും പേരുണ്ടായിരുന്നു. ഇക്കാര്യം ആരും അറിയിച്ചില്ലെന്നും ഉടന് തന്നെ താന് ലണ്ടനിലേയ്ക്ക് പോകുമെന്നും സുധാ സിങ്ങ് ധര്മ്മശാലയില് പറഞ്ഞു.
2012, 2016 ഒളിമ്പിക്സിലും 2015 ലെ ലോക ചാമ്പ്യന്ഷിപ്പിലും ഇന്ത്യയെ പ്രതിനിധാനം ചെയ്ത താരമാണ് സുധാ സിങ്. നൂറു മീറ്ററില് മത്സരിക്കാന് ദ്യൂതി ചന്ദും രണ്ടു ദിവസത്തിനുളളില് ലണ്ടനിലേക്ക് പറക്കും.
