തിരുവനന്തപുരം: കസ്റ്റഡിയിലെടുത്ത ശേഷം പോലീസ് വിട്ടയച്ച തൃശൂര് പാവറട്ടി സ്വദേശി വിനായകന്റെ മരണത്തെക്കുറിച്ച് ക്രൈംബ്രാഞ്ച് അന്വേഷിക്കും. സംസ്ഥാന പോലീസ് മേധാവി ലോക്നാഥ് ബെഹ്റയാണ് അന്വേഷണത്തിന് ഉത്തരവിട്ടത്.
പോലീസ് കസ്റ്റഡിയില് വിനായകന് നേരെ പീഡനമുണ്ടായോ എന്ന് പരിശോധിക്കും. പോലീസ് വിട്ടയച്ച വിനായകനെ വീടിനുള്ളില് തൂങ്ങിമരിച്ച നിലയില് കണ്ടെത്തുകയായിരുന്നു. സ്റ്റേഷനില് വച്ച് വിനായകന് ക്രൂരപീഡനത്തിന് ഇരയായെന്നാണ് ബന്ധുക്കളുടെ പരാതി.
വിനായകന്റെ മരണവുമായി ബന്ധപ്പെട്ട് വാടാനപ്പള്ളി പോലീസ് രജിസ്റ്റര് ചെയ്ത കേസാണ് ക്രൈംബ്രാഞ്ചിന് കൈമാറിയത്. സംഭവത്തില് സീനിയര് സിപിഒ സാജന്, സിപിഒ ശ്രീജിത്ത് എന്നിവരെ അന്വേഷണ വിധേയമായി സസ്പെന്ഡ് ചെയ്തിരുന്നു. വിനായകന്റെ ശരീരത്തില് മര്ദനമേറ്റതിന്റെ പാടുകള് ഉണ്ടെന്നാണ് പോസ്റ്റുമോര്ട്ടം റിപ്പോര്ട്ട്. പോലീസിനെതിരെ വലിയ പ്രതിഷേധം ഉയരുന്നതിനിടെയാണ് അന്വേഷണം ക്രൈംബ്രാഞ്ചിന് വിട്ടത്.
വിനായകന്റെ മരണത്തെക്കുറിച്ച് ക്രൈംബ്രാഞ്ച് അന്വേഷിക്കണമെന്ന് തൃശൂര് ഐജി അജിത്കുമാര് ഡിജിപിക്കു ശുപാര്ശ ചെയ്തിരുന്നു. വിനായകന്റെ അച്ഛന് റൂറല് പോലീസ് മേധാവിക്കു നല്കിയ പരാതിയുടെ പശ്ചാത്തലത്തിലായിരുന്നു നിര്ദേശം.
