ആതിരയെ ആയിഷയാക്കിയതാര്? ചോദ്യങ്ങളുമായി ഡിവൈഎഫ്‌ഐ നേതാവ്

കൊച്ചി: കാസര്‍കോട് സ്വദേശിനി ആതിരയെ മതംമാറ്റിയ വിഷയത്തില്‍ ശക്തമായ പ്രതികരണവുമായി വീണ്ടും ഡിവൈഎഫ്‌ഐ നേതാവ് എ.വി. ശിവപ്രസാദ്. മതവര്‍ഗീയ വാദികളുടെ തീവ്രമായ പരിശീലനത്തിന്റെയും കൗണ്‍സിലിങ്ങിന്റെയും ഭാഗമായാണ് ആതിരയുടെ മതംമാറ്റമെന്നും നിര്‍ബന്ധിത മതപരിവര്‍ത്തനം ആരു നടത്തിയാലും കുറ്റകരവും എതിര്‍ക്കപ്പെടേണ്ടതുമാണെന്നും ഡിവൈഎഫ്‌ഐ ഉദുമ ബ്ലോക്ക് സെക്രട്ടറി ശിവപ്രസാദ് തന്റെ ഫേസ്ബുക്ക് പോസ്റ്റില്‍ പറയുന്നു.

നേരത്തെ ഇതേ വിഷയത്തില്‍ മതപരിവര്‍ത്തനത്തെ എതിര്‍ത്ത് ശിവപ്രസാദ് പോസ്റ്റിട്ടിരുന്നു. കാസര്‍കോട് ഗവ.കോളേജ് കേന്ദ്രീകരിച്ച് മതപരിവര്‍ത്തനത്തിനായി വലിയ സംഘം പ്രവര്‍ത്തിക്കുന്നുണ്ടെന്ന് ആരോപിച്ച പോസ്റ്റ് സിപിഎമ്മിന്റെയും ഡിവൈഎഫ്‌ഐയുടെയും സമ്മര്‍ദ്ദത്തെ തുടര്‍ന്ന് ശിവപ്രസാദ് പിന്‍വലിച്ചിരുന്നു. ആയിഷയായി മതംമാറിയ ആതിര കഴിഞ്ഞ ദിവസം കോടതിയില്‍ ഹാജരാവുകയും മഹിളാമന്ദിരത്തിലേക്ക് മാറ്റുകയും ചെയ്തതിന് പിന്നാലെയാണ് വീണ്ടും ശിവപ്രസാദിന്റെ പോസ്റ്റ്.

സ്വന്തം ഇഷ്ടപ്രകാരം മാത്രമാണ് ആതിര പോയതെന്ന് വിശ്വസിക്കാന്‍ മാത്രം വിഡ്ഢികളാണോ നാട്ടിലെ ജനങ്ങളെന്ന് ഡിവൈഎഫ്‌ഐ നേതാവ് ചോദിക്കുന്നു. പോലീസ് അരിച്ച് പെറുക്കിയിട്ടും 19 ദിവസക്കാലം പിടിക്കൊടുക്കാതെ ഏത് സങ്കേതത്തിലാണ് അവളെ ഒളിപ്പിച്ച് പാര്‍പ്പിച്ചത്, അന്വേഷണത്തിന്റെ ഭാഗമായി ചില മത വര്‍ഗീയ വാദികളെയും ആതിരയെ കടത്താന്‍ സഹായിച്ചു എന്ന് സംശയമുള്ള ചില സുഹൃത്തുക്കളെയും കസ്റ്റഡിയില്‍ വെച്ചപ്പോള്‍ മാത്രം എങ്ങനെ ആതിര പോലീസിന് മുമ്പില്‍ നാടകീയമായി പ്രത്യക്ഷപ്പെട്ടു, ഫിദ എന്ന പെണ്‍കുട്ടി പഠനാവശ്യത്തിനാണെന്നു പറഞ്ഞ് ‘അഖില ‘ എന്ന പേര് മാറ്റി വീട്ടുകാരെ പരിചയപ്പെടുത്തി ഒരാഴ്ചക്കാലം ആതിരയുടെ വീട്ടില്‍ താമസിച്ചത് എന്തിനായിരുന്നു തുടങ്ങിയ ഏഴോളം ചോദ്യങ്ങളും ശിവപ്രസാദ് പോസ്റ്റില്‍ ഉന്നയിക്കുന്നത്.

സൗഹൃദം, പ്രണയം, പ്രലോഭനം ,സമ്മര്‍ദ്ദം എന്നിവയിലൂടെ മതംമാറ്റി ഐഎസ്സില്‍ വരെ എത്തിക്കുന്ന സംഭവങ്ങള്‍ പൊയിനാച്ചി ഡെന്റല്‍ കോളേജിലും പടന്നയിലും തൃക്കരിപ്പൂരിലും കണ്ടതാണെന്നും ഇനിയും രക്ഷിതാക്കള്‍ക്ക് ആതിര മാരെയും ആയിഷമാരെയും നഷ്ട്ടപ്പെടാതിരിക്കാനുള്ള ഉള്‍ക്കാഴ്ച നമ്മുടെ നാടിന് ഉണ്ടാവണമെന്നും പോസ്റ്റില്‍ പറയുന്നു.

ശിവപ്രസാദിനെ അനുകൂലിച്ചും എതിര്‍ത്തും കമ്മികള്‍ തന്നെ രംഗത്തെത്തിയിട്ടുണ്ട്. പഴയതുപോലെ ഈ പോസ്റ്റും മുക്കുമോയെന്നും ചോദ്യമുണ്ട്.

പോസ്റ്റിന്റെ പൂര്‍ണരൂപം