ദേവസ്വം ജീവനക്കാരന് തള്ളിയിട്ടതിനെ തുടര്ന്ന് തുടയെല്ല് പൊട്ടിയ കുഞ്ഞുലക്ഷ്മിയമ്മ ശസ്ത്രക്രിയക്ക് ശേഷം
ഗുരുവായൂര്: ക്ഷേത്രത്തില് തൊഴുത ശേഷം പരിചയക്കാരോട് സംസാരിച്ചു നില്ക്കുകയായിരുന്ന വയോധികയെ വഴി തടസ്സപ്പെടുത്തിയെന്ന് ആരോപിച്ച് ക്ഷേത്രം കാവല്ക്കാരന് പിടിച്ചു തള്ളി. തള്ളലിന്റെ ആഘാതത്തില് മറിഞ്ഞു വീണ് ഇടത്തേ കാലിന്റെ തുടയെല്ലു പൊട്ടിയ ഇവരെ ചാവക്കാട് താലൂക്ക് ആശുപത്രിയില് ശസ്ത്രക്രിയയ്ക്ക് വിധേയയാക്കി. പൊന്നാനി എരമംഗലം സ്വദേശി കിഴക്കേവളപ്പില് പരേതനായ കൃഷ്ണന്റെ ഭാര്യ കുഞ്ഞിലക്ഷ്മി അമ്മ (70) ക്കാണ് പരിക്കേറ്റത്. വ്യാഴാഴ്ചയാണ് സംഭവം.
കുഞ്ഞിലക്ഷ്മി അമ്മയും മകന് സുധീറിന്റെ ഭാര്യ രത്നവും കൂടി ക്ഷേത്രത്തില് തൊഴുതു പുറത്തിറങ്ങി പരിചയക്കാരുമായി സംസാരിക്കുന്നതിനിടെ ക്ഷേത്രത്തിനകത്തെ കാവല്ക്കാരന് ശിവശങ്കരന് താന് പോകുന്ന വഴി തടസ്സപ്പെടുത്തി എന്നാരോപിച്ച് ഇവരെ പിടിച്ച് തള്ളുകയുമായിരുന്നു. വീണു പരിക്കേറ്റ കുഞ്ഞിലക്ഷ്മി അമ്മയെ ഉടനെ ദേവസ്വം ആശുപത്രിയിലെത്തിച്ചുവെങ്കിലും എക്സ് റേ നോക്കിയ ഡോക്ടര് സ്വകാര്യ ആസ്പത്രിയില് കൊണ്ടു പോകാന് നിര്ദ്ദേശിക്കുകയായിരുന്നുവെന്ന് രത്നം പറഞ്ഞു.
ദേവസ്വം ആശുപത്രിയില് പരിശോധിച്ച ഡോക്ടറോട് തള്ളിയിട്ടതിനാല് വീണു എന്ന് വ്യക്തമായി പറഞ്ഞിട്ടും പോലീസിനുള്ള അറിയിപ്പില് വീണു പരിക്കുപറ്റി എന്നു മാത്രമാണ് എഴുതിയത്. ഇത് മൂലം ടെമ്പിള് പോലീസ് കേസ്സെടുക്കാന് വിസമ്മതിച്ചു. തങ്ങള് എഴുതി കൊടുത്ത പരാതി കൈപ്പറ്റാനും പോലീസ് വിസമ്മതിച്ചുവെന്ന് മകന് സുധീര് പറഞ്ഞു.
ദേവസ്വം അഡ്മിനിസ്ട്രേറ്റര്ക്ക് പരാതി കൊടുക്കാന് പോയ തങ്ങളെ ദേവസ്വം ജീവനക്കാര് പരിഹസിക്കുകയാണ് ചെയ്തതെന്നും പരാതിപ്പെട്ടിയില് നിക്ഷേപിക്കാന് പറയുകയാണ് ചെയ്തതെന്നും സുധീര് പറഞ്ഞു. സംഭവം നടന്നതിന്റെ അടുത്ത ദിവസം കേസ്സ് ഒതുക്കി തീര്ക്കാന് ശിവശങ്കരന് നേരിട്ടു വന്ന് 15000 രൂപയും ഇന്നലെ ക്ഷേത്രം ഡഫേദറായ തങ്ങളുടെ അയല്വാസി മുഖേന 35000 രൂപയും വാഗ്ദാനം ചെയ്തുവെന്ന് പരാതിക്കാര് പറഞ്ഞു.
കെ.വി.അബ്ദുള് ഖാദര് എം.എല്.എ, മഹിളാ മോര്ച്ച സംസ്ഥാന ജനറല് സെക്രട്ടറി അഡ്വ.നിവേദിത എന്നിവര് ആശുപത്രിയിലെത്തി കുടുംബത്തെ ആശ്വസിപ്പിച്ചു. ഗുരുവായൂരിലെത്തുന്ന ഭക്തര്ക്ക് മനസ്സമാധാനത്തോടെ ദര്ശനം നടത്താനുള്ള അവസരമുണ്ടാക്കണമെന്ന് ഭക്തജന സംഘടനകള് ആവശ്യപ്പെട്ടു.
