ഇരിങ്ങാലക്കുട : സമ്പൂര്ണ്ണ കുടിവെള്ള പദ്ധതിയുടെ ഭാഗമായി പൊളിച്ചിട്ട കിഴുത്താണി – പുല്ലത്തറ കാറളം റോഡ് മഴയില് ചെളിക്കുളമായി. കാല്നടയാത്രക്കാരടക്കമുള്ളവരും വാഹനയാത്രക്കാരും ഇതുമൂലം ബുദ്ധിമുട്ടിലായി.
രണ്ട് വര്ഷം മുമ്പാണ് പൈപ്പിടുന്നതിനായി റോഡിന്റെ ഒരുവശം മുഴുവന് ജെ.സി.ബി ഉപയോഗിച്ച് പൊളിച്ചിട്ടത്. പൈപ്പിങ്ങ് പൂര്ത്തിയായെങ്കിലും ഇതുവരേയും റോഡ് ടാറിങ്ങ് നടത്തിയിട്ടില്ല.
മഴക്കാലമായതോടെ മണ്ണ് താഴേക്കിരുന്ന് വലിയ താഴ്ചയില് ചാല് രൂപപ്പെട്ടിരിക്കുകയാണ്. വാഹനങ്ങള് കുഴി ഒഴിവാക്കുന്നതിനായി എതിര്വശം ചേര്ത്ത് എടുക്കുന്നതിനാല് ആ ഭാഗവും താഴ്ന്നു. വെള്ളം കെട്ടിക്കിടന്ന് പലയിടത്തും റോഡ് തകര്ന്നു.
നേരത്തെ കാറളം സെന്റര് റോഡിന്റെ ദുരവസ്ഥ മാറ്റാന് ആക്ഷന് കൗണ്സിലിന്റെ നേതൃത്വത്തില് ശയനപ്രദക്ഷിണമടക്കം നിരവധി സമരങ്ങള് നടത്തിയിരുന്നു.
തുടര്ന്ന് പ്രൊഫ. കെ.യു. അരുണന് എം.എല്.എ സ്ഥലം സന്ദര്ശിച്ച് പുതിയ ടെണ്ടര് നടത്തി റോഡ് ടാറിങ്ങ് നടത്തി സഞ്ചാരയോഗ്യമാക്കാന് പി.ഡബ്ല്യൂ.ഡി ഉദ്യോഗസ്ഥര്ക്ക് നിര്ദ്ദേശം നല്കിയിരുന്നു.
അതോടൊപ്പം ഈ റോഡിനും ടെണ്ടര് നടപടികള് പൂര്ത്തിയായിട്ടുണ്ടെന്നാണ് അധികൃതര് പറയുന്നത്.
പ്രതികരിക്കാൻ ഇവിടെ എഴുതുക: