കൊച്ചി: കൊച്ചിയില് പ്രമുഖ നടിയെ ആക്രമിച്ച കേസില് ഗൂഢാലോചനക്കുറ്റത്തിന് അറസ്റ്റിലായ നടന് ദിലീപിന്റെ ജാമ്യാപേക്ഷയില് ഇരുവിഭാഗത്തിന്റെയും വാദം പൂര്ത്തിയായി. തുടർന്ന് ജാമ്യാപേക്ഷയില് വിധി പറയുന്നത് മാറ്റിവച്ചു. ദിലീപിന് വേണ്ടി മുതിര്ന്ന അഭിഭാഷകന് കെ രാംകുമാറും പ്രോസിക്യൂഷന് വേണ്ടി ഡയറക്ടര് ജനറല് ഓഫ് പ്രോസിക്യൂഷന് മഞ്ചേരി ശ്രീധരന് നായരുമാണ് ഹാജരായത്.
ചരിത്രത്തിലെ ആദ്യത്തെ മാനഭംഗ ക്വട്ടേഷനാണിതെന്ന് ഡയറക്ടര് ജനറല് ഓഫ് പ്രോസിക്യൂഷന് (ഡിജിപി) വാദിച്ചു. കേസിലെ നിര്ണായക തെളിവുകളടങ്ങിയ കേസ് ഡയറി പ്രോസിക്യൂഷന് കോടതിയില് ഹാജരാക്കി.
നേരത്തെ ദിലീപിന്റെ ജാമ്യാപേക്ഷ അങ്കമാലി ഫസ്റ്റ് ക്ലാസ് കോടതി തള്ളിയിരുന്നു. മജിസ്ട്രേട്ട് കോടതി ജാമ്യം നിഷേധിച്ചാല് ജില്ലാ സെഷന്സ് കോടതിയില് ജാമ്യാപേക്ഷ നല്കാന് അവസരമുണ്ടെങ്കിലും അതിനു ശ്രമിക്കാതെ ദിലീപ് നേരിട്ട് ഹൈക്കോടതിയെ സമീപിക്കുകയായിരുന്നു.
കേസിലെ ഗൂഢാലോചനയുടെ മുഖ്യസൂത്രധാരന് നടന് ദിലീപാണെന്ന് പ്രോസിക്യൂഷന് ഹൈക്കോടതിയില് വാദിച്ചു. ദിലീപിന്റെ ജാമ്യാപേക്ഷയിലെ വാദത്തിനിടെയാണ് പ്രോസിക്യൂഷന് ഇക്കാര്യം ഉന്നയിച്ചത്.
ഗൂഢാലോചനയുടെ കിംഗ് പിന് ആയതിനാല് പ്രതിക്ക് ജാമ്യം ലഭിച്ചാല് കേസിന്റെ തുടര്ന്നുള്ള അന്വേഷണത്തെ അത് ബാധിക്കും. കേസിനെ സ്വാധീനിക്കാന് സാധ്യതയുണ്ട്. അതിനാല് ജാമ്യം അനുവദിക്കരുതെന്നും പ്രോസിക്യൂഷന് വാദിച്ചു.
എന്നാല് കേസിലെ ഗൂഢാലോചനയില് ദിലീപിനെതിരെ യാതൊരു തെളിവും ഇല്ലെന്ന് ദിലീപിന് വേണ്ടി ഹാജരായ കെ രാംകുമാര് പറഞ്ഞു. കേസില് ഗൂഢാലോചന നിലനില്ക്കില്ലെന്നും അദ്ദേഹം വാദിച്ചു. ലൊക്കേഷനില് സുനി വന്നു എന്നത് ഗൂഢാലോചനയായി കണക്കാക്കാനാകില്ല.
പരാതിക്കാരിയായ നടിയുടെ പ്രസ്താവനയിലും ദിലീപിനെ സംശയിക്കുന്നില്ലെന്നും അദ്ദേഹം വാദിച്ചു. ദിലീപ് കേസന്വേഷണത്തോട് പൂര്ണമായും സഹകരിച്ചിട്ടുണ്ട്. മുന്കൂര് ജാമ്യത്തിന് പോലും ശ്രമിച്ചില്ല. അറസ്റ്റിലായ ദിവസം പത്തുമണിക്കൂര് ചോദ്യം ചെയ്തു, രാംകുമാര് ചൂണ്ടിക്കാട്ടി. എന്നാല് തെളിവെടുപ്പ് പൂര്ത്തിയായതിനാല് ജാമ്യം അനുവദിക്കണമെന്നായിരുന്നു ദിലീപിന്റെ അഭിഭാഷകന് രാംകുമാറിന്റെ വാദം.
പ്രതികരിക്കാൻ ഇവിടെ എഴുതുക: